Eýraziialyq ekonomikalyq komissiianyń energetika jáne infraqurylym jónindegi múshesi (ministri) Emil Kaikiev Eýraziialyq ekonomikalyq odaq aiasynda gazdyń ortaq naryǵyna qatysty oiymen bólisti, dep habarlaidy QazAqparat.
«Qazirgi ýaqytta naqty qunyn ataý múmkin emes. Búginde bizde gazdyń ortaq naryǵyn qalyptastyrý jónindegi baǵdarlama bar. Oǵan sáikes, gaz jetkizý jónindegi ekijaqty halyqaralyq kelisimsharttardan bólek kelisimsharttardy júzege asyrý naryqtyq baǵa boiynsha jasalýy tiis», - dedi ol Ortalyq kommýnikatsiialar qyzmetiniń kóshpeli baspasóz máslihaty barysynda.
Máselen, onyń túsindirýinshe, gaz jetkizý týraly eki memleket kelisimshart jasaidy. Dál osy qujat halyqaralyq kelisimshart dep atalady. Soǵan sáikes, sharýashylyq júrgizýshi sýbekt kelisimshartty júzege asyrý úshin sharýashylyq júrgizýshi sýbektiler arasynda shart jasasady.
«Bizde halyqaralyq kelisimshartty júzege asyrý maqsatynda sharýashylyq júrgizýshi sýbektiler arasynda tikelei shart, birjalyq shart (birjalyq mámile boiynsha) jáne ekijaqty shart jasasýǵa bolady. Ázirshe, gazdy tasymaldaýǵa arnalǵan tarifti daiyndaý tetikteri joq. Qazirgi ýaqytta gazdyń ortaq naryǵy týraly halyqaralyq kelisimshart daiyndalyp jatyr jáne atalǵan kelisimshart aiasynda gazǵa arnalǵan tranzittik kólik tarifiniń ustanymdary bekitiledi. Bul kelisimshartqa qol qoiý 2022 jylǵa qarastyrylǵan. Al qazirgi ýaqytta ol daiyndalý ústinde. Ol 2025 jyldyń 1 qańtarynan buryn kúshine enbeidi. Mine sol kezde ǵana gaz tasymalynyń baǵasyn qalyptastyrý jóninde belgili bir ustanymdar jaiynda sóz qozǵaýǵa bolady», - dedi Emil Kaikiev.
