Eýraziialyq ekonomikalyq odaq (EAEO) aýmaǵyndaǵy jumys berýshiler azamattyǵyna qaramastan, múshe elderden maman izdestire alady. Bul týraly Saýda jáne integratsiia vitse-ministri Janel Kýshýkova aityp berdi, dep habarlaidy "Ult aqparat".
Ótken jyldyń aiaǵynda Eýraziialyq ekonomikalyq integratsiiany damytýdyń 2025 jylǵa deiingi strategiialyq baǵyttaryn iske asyrý jónindegi is-sharalar jospary qabyldanǵan.
«Jospar 523 is-sharany qamtidy jáne EAEO organdarynyń 50 halyqaralyq sharty men 220 aktisin ázirleýdi kózdeidi. Barlyq sharalar kedergilerdi joiýǵa, erkin naryqty qalyptastyrý jolyndaǵy biýrokratiialyq jáne ákimshilik kedergilerden bosatýǵa baǵyttalǵan. Bul tek taýarlarǵa ǵana emes, eńbek kúshiniń qozǵalysyna da qatysty bolady», - dedi Kýshýkova Ortalyq kommýnikatsiialar qyzmetinde ótken baspasóz máslihatynda.
Al búgin Eýraziialyq ekonomikalyq komissiia keńesinde biylǵy 1 shildeden bastap «Shekarasyz jumys» aqparattyq resýrsynyń iske qosylýy týraly sheshimge qol qoiylady.
«Bul kádimgi eńbek birjasy, biraq shekara bolmaidy. Osy resýrs arqyly EAEO aýmaǵyndaǵy jumys berýshiler azamattyǵyna qaramastan, jumyskerlerdi izdestire alady», - dep túsindirdi spiker.
Sonymen birge, vitse-ministr «Koronavirýs pandemiiasyna bailanysty EAEO aýmaǵynda jumysqa turý talaptary ózgerdi me?» degen suraqqa jaýap berdi.
«Dál koronavirýs pandemiiasyna bailanysty jumysqa turý máselelerin retteitin zańnamamyz ózgertilgen joq. Qazir memleketter aýmaǵyna kirip-shyǵý erejeleri ózgerdi, KVI teris nátijesi bar PTR anyqtamasy suralady. Bizdiń Qazaqstanda da jumysqa ornalasý úshin ázirge vaktsinalaý pasporty talap etilmeidi, EAEO ózge elderinde de jaǵdai osyndai. PTR anyqtamasynan basqa esh ózgeris joq dep aitýǵa bolady», - dep túsindirdi Kýshýkova.
