Dziýdodan Qazaqstan ulttyq qurama komandasy Japoniiada ótetin «Grand Slam» jarysyna qatysady, dep habarlaidy "Ult aqparat" QR Ulttyq Olimpiadalyq komitetine silteme jasap.
«22-24 qarasha kúnderi Japoniianyń Osaka qalasynda dziýdodan kezekti «Grand Slam» álemdik týrniri ótedi. Dúbirli dodaǵa álem chempionatynyń kúmis júldegeri Rýstam Ibraev (60 keli), odan bólek Jansai Smaǵulov pen Janbolat Baǵytbergenov (ekeýi de 73 keli), Rýslan Mýsaev (81 keli), Ersultan Muzapparov (90 keli), Aibek Serikbaev (100 keli) jáne Erasyl Qajybaevtar (100 keliden joǵary) qatysady. Atalǵan sportshylardyń barlyǵy jarysqa tyńǵylyqty daiyndaldy. Sportshylarymyz jarystan jeńispen oralady dep úmittenemiz», - dedi Ulttyq quramanyń bas bapkeri Aidyn Smaǵulov.
Al burymdy balýandardan Osaka tatamiinde el namysyn Otgontsetseg Galbadrah (48 keli), Sevara Nishanbaeva (57 keli) jáne Zarina Raifova (78 keli) qorǵaidy.
