Djordj Floidty moiynyn tizesimen basyp qinaǵan Minneapolistiń burynǵy politsiia qyzmetkeri Derek Shovinge burynǵydan da aýyr aiyp taǵyldy.
Prokýratýra sondai-aq taǵy úsh politsiia qyzmetkerine aiyp taqty, dep habarlaidy bbc saity.
Jariialanǵan sot qujattaryna sáikes, Shovinge ekinshi dárejedegi kisi óltirý áreketi boiynsha taǵy jańa aiyptar taǵylǵan. Ustaý kezinde bolǵan taǵy úsh politsiia qyzmetkerine adam óltirýge kómektesý jáne oǵan arandatý boiynsha aiyp taǵyldy.
Áýelde Shovinge úshinshi dárejedegi, iaǵni baiqaýsyzda kisi óltirý áreketi boiynsha aiyp taǵylǵan edi. Ekinshi dárejedegi kisi óltirý Amerika zańnamalarynda ózgelermen kelisilmegen, biraq qasaqana kisi óltirý, densaýlyqqa qasaqana ziianyn tigizý, adam ómirine degen nemquraidylyq áreketi bolyp esepteledi.
Al Floidtyń ólimine qatysty ózgeler politseilerge aldymen aiyp taǵylmaǵan bolatyn. Olar tek jumystan shyǵarylǵan edi. Biraq Floidtyń jaqyndary olardy da jaýapqa tartýdy talap etti.
Endi Floidtyń isi boiynsha 4 adamǵa aiyp taǵylyp otyr.
Reiter agenttiginiń habarlaýynsha, shtattyń Bas prokýrory úsh politseidi tutqyndaýǵa order bergen.
Shovin ótken aptanyń sońynda tutqyndaldy. Minnesota shtatynyń bas prokýrory Kit Ellison Fox News telearnasyna bergen suhbatynda 4 politseige de eń joǵary jaza taǵaiyndalýy múmkin ekendigin málimdedi.
Eger olar barlyq baptar boiynsha aiypty dep tanylsa, uzaq merzimge sottalady jáne iri kólemde aiyppul tóleidi. Ekinshi dárejedegi adam óltirý úshin 40 jylǵa deiin bas bostandyǵynan aiyrý jazasy qarastyrylǵan.
Politseilerdi qamaýdan bosatý úshin tólenetin kepil somasy – bir million dollar.
