Mihail Gorbachev AQSh prezidenti úlken Djordj Býshpen birge otyr.
Sovet odaǵynyń sońǵy basshysy Mihail Gorbachevtyń qaitys bolǵany jóninde álemniń kóptegen saiasatkeri pikir bildirdi. Buqaralyq aqparat quraldary Gorbachevtyń portretin bas betke ilip jatyr. Al redaktsiialyq baǵandarda oǵan madaq aitqandar kóp, dep habarlaidy Azattyq.
AQSh prezidenti Djo Baiden Gorbachevty "sirek kezdesetin lider", "jarqyn bolashaqty kóre alatyn, sol úshin mansabyn qatergi tigýge batyly jetken adam" retinde sipattady. Onyń osy "batyldyǵy arqasynda álem qaýipsizdeý bola tústi, milliondaǵan adam erkindikke qol jetkizdi" dedi ol.
BUU Bas hatshysy Antoniý Gýtterish Mihail Gorbachevty álem tarihynyń baǵytyn ózgertken adam dep atady. Onyń sózinshe, Qyrǵi-qabaq soǵysynyń aiaqtalýyna Gorbachevtei úles qosqan adam joq.
Ulybritaniia premer-ministri Boris Djonson Gorbachevtyń Qyrǵi-qabaq soǵysty beibitshilikke ulastyrýdaǵy tik minezdigi men batyldyǵyna árdaiym tamsanǵanyn aitty.
"Pýtinniń Ýkrainadaǵy agressiiasy tusynda onyń sovet qoǵamyn ashyq etýge degen talpynysy biz úshin árdaiym úlgi bolmaq" dep jazdy ol.
Frantsiia prezidenti Emmanýel Makronnyń sózinshe, Gorbachevtyń Eýropadaǵy beibitshilikke umtylysy tarihty ózgertip, reseilikterge erkindik jolyn ashqan.
Al nemis saiasatkerleri Gorbachevtyń Berlin qabyrǵasyn qulatýdaǵy úlesin atap ótip jatyr. "Shyǵys blok elderindegi beibit revoliýtsiialardy, sonyń ishinde bizdegini Gorbachevsyz elestetý múmkin emes" dedi býndestag vitse-prezidenti Katrin Gioring-Ekkardt.
"Gorbachev bizge erkindik berdi. Resei men onyń ainalasyndaǵy júzdegen million adamǵa, sondai-aq Eýropanyń jartysyna erkindik syilady. Osy erkindikti, uly múmkindikti biz Reseide qalai paidalanǵanymyz – bizdiń jaýapkershiligimiz" dedi reseilik saiasatker, "Iabloko" partiiasynyń negizin qalaýshy, 1990 jyly RSFSR ministrler keńesi tóraǵasynyń orynbasary bolǵan Grigorii Iavlinskii.
Gorbachevty álemniń kez kelgen elinde qushaq jaia qarsy alatyn edi, biraq ol synaýshylary kóp Reseide qaldy deidi Iavlinskii.
