AQSh prezidenti Djo Baiden áielimen birge 24 mamyrdaǵy atys kezinde ólgen eki muǵalim men 19 oqýshyny eske alýshylarǵa qoldaý kórsetý úshin Tehas shtatynyń Iývald qalasyna bardy.
Baidenniń jary bir ai ishinde osyndai ekinshi saparǵa shyǵyp tur. 17 mamyrda Aq úi basshysy Niý-Iork shtatyndaǵy Býffalo qalasyna kelip, násilshil qylmysker oǵynan qaza bolǵandardyń otbasylarymen kezdesken. Bul oqiǵa kezinde afroamerikalyq 10 adam ólgen edi.
Iývald qalasynda Djo Baiden áieli ekeýi qaraly jiynǵa qatysyp, memorialǵa gúl qoidy.
Odan bir kún buryn Baiden ózi oqyǵan Delaver shtatynyń ýniversitetinde sóilep, eki oqiǵa kezinde "jazyqsyz adamdar ólgenin" aityp: "Nyǵaiyp, kúsheie túsýimiz kerek. Biz tragediianyń qaidan kelerin bilmeimiz, biraq Amerikany qaýipsiz ete alamyz", — degen edi.
"Iývaldtegi qandy oqiǵa qarýǵa baqylaý ornatý máselesin taǵy saiasi kún tártibine shyǵardy. Prezident pen áieliniń Tehasqa sapary quqyq qorǵaý organdarynyń jedel áreketi jónindegi pikirtalastar kúsheigen kezge tuspa-tus keldi" deidi "Amerika daýysy".
Iývald oqiǵasynda "politseiler arnaýly jasaqty kútip bir saǵat kidirdi, bul kezde qylmysker mektep ishinde júrdi" degen syn aitylǵan.
AQSh ádilet ministrligi quqyq qorǵaý organdarynyń reaktsiiasyn tekserip, qorytyndysyn jariialaýǵa ýáde berdi.
Iývald mektebinde oq atqan 18 jastaǵy Salvador Ramosty sol jerde qaýipsizdik qyzmetkerleri atyp óltirgen. Onyń bul áreketke ne sebepten barǵany belgisiz. Mektepke shabýyl aldynda ájesin atyp ketken. Bul shabýyl — Amerika mektepterine jasalǵan iri shabýyldardyń biri.
