Alibaba negizin qalaýshy Djek Ma qoǵamdyq ómirge oraldy, kásipker kompaniianyń shtab-páterine bardy, - dep habarlaidy Tengrinews Reuters agenttigine silteme jasap.
Djek Ma Hanchjoýdaǵy Alibaba Group kampýsynyń birinde bolǵan. Qytaidyń iri kompaniialarynyń biriniń negizin qalaýshy áriptesterimen birge jyl saiynǵy "Ali kúni" (Ali Day) is-sharasyna qatysýdy sheshipti.
Qyzmetkerler túsirgen fotosýretter men beinejazbalarǵa sáikes, Djek Ma bul is-sharaǵa Alibaba kompaniiasynyń basqa basshylarymen birge qatysqan. Direktorlar keńesiniń tóraǵasy qyzmetinen ketse de, Ma kompaniiada áli de bedeldi ekeni atap ótiledi.
Djek Ma byltyr kúzde Qytai úkimetin synaǵannan keiin qoǵamdyq qyzmetin toqtatqan edi. Sodan keiin QHR biligi Alibaba Group-qa qatysty monopoliiaǵa qarsy tergeý bastap, kompaniia aktsiialaryn satýǵa tyiym salǵan. Osylaisha, tek bir kúnde ol 3,5 milliardtan asa dollardan jáne Aziiadaǵy eń bai adam ataǵynan.
Osydan keiin milliarder kópshilik aldyna tek onlain shyqqan. Qańtarda ol aýyl muǵalimderin qoldaýǵa arnalǵan onlain-sharaǵa qatysqan. Sáýirdiń ortasynda Ma Resei geografiialyq qoǵamy qamqorshylar keńesiniń beinekonferentsiiasynda bolǵan.
Buǵan deiin Qytai Alibaba kompaniiasyna mediaaktivterinen qutylýdy talap etip, kompaniiaǵa tarihtaǵy eń úlken aiyppul salǵany habarlanǵan bolatyn. Sonymen qatar, el biligi Djek Ma biznes mektebin stýdentterdi qabyldaýdy toqtatýǵa májbúr etip, kompaniiasynyń ókilderi jáne kásipkerdiń ózimen kelissóz júrgizgen. Kezdesýlerde Djek Manyń kompaniiadan ketýi jáne úlesin satý máselesi talqylanǵan edi.
