Búgin Qytaidaǵy eń bai adam Djek Ma Alibaba Group direktorlar keńesiniń tóraǵasy qyzmetinen ketedi.
Qytailyq BAQ-tyń habarlaýynsha, muny ol bir jyl buryn jariialaǵan. Direktorlar keńesiniń tóraǵasy laýazymy qazirgi bas direktor Daniel Chjanǵa beriledi.
Qyzmetinen ketken soń Djek Ma Alibaba Group-tiń direktorlar keńesiniń múshesi retinde kompaniianyń 2020 jylǵy jalpy jinalysyna deiin jumysyn jalǵastyrady. Osydan keiin ol «Alibaba turaqty seriktesi» qyzmetinde bolady.
Jospar boiynsha búgin keshke Hanchjoýda Alibaba qurylýynyń 20 jyldyq mereitoiy ótedi. Sol rásimde direktorlar keńesiniń tóraǵasy Djek Ma qyzmetin Daniel Chjanǵa resmi túrde tapsyrady.
Qazirgi ýaqytta Alibaba Group Djek Manyń otstavkaǵa ketetini týraly resmi aqparat jariialamady.
Djek Ma nemese Ma Iýn - qytai kásipkeri jáne filantrop. Ol - Alibaba Group tabysty internet biznes tobynyń negizin qalaýshy jáne atqarýshy tóraǵasy, Forbes muqabasyna jariialanǵan alǵashqy qytailyq kásipker.
