Dýshanbede Ekonomikalyq yntymaqtastyq jónindegi Qazaqstan – Tájikstan úkimetaralyq komissiiasynyń XVI otyrysy ótti, dep habarlaidy "Ult aqparat".
Qazaqstan Respýblikasy Premer-Ministriniń orynbasary Roman Skliar ekonomikalyq yntymaqtastyq jónindegi Qazaqstan – Tájikstan úkimetaralyq komissiiasynyń XVI otyrysyna qatysý úshin qazaqstandyq delegatsiiany basqardy.
Otyrysqa ministrlikter men vedomstvolardyń, ulttyq kompaniialardyń ókilderi, sondai-aq eki taraptyń tiisti uiymdarynyń shaqyrylǵan ókilderi qatysty.
Sapar aiasynda Roman Skliar Tájikstan Premer-Ministri Kohir Rasýlzodamen kezdesti, onda saýda-ekonomikalyq, ónerkásiptik jáne qurylys salalaryndaǵy yntymaqtastyqtyń keń aýqymdy máseleleri qaraldy.
Roman Skliar men Komissiianyń teń tóraǵasy – Tájikstan Respýblikasy Premer-Ministriniń birinshi orynbasary Davlatali Saidtyń kezdesýinde eki eldiń aýyl sharýashylyǵy, azyq-túlik qaýipsizdigi, energetika jáne sý resýrstary, kólik jáne azamattyq aviatsiia salasyndaǵy ózara is-qimyl taqyryptary kórinis tapty.
Sondai-aq 2019 jylǵy sáýirde Nur-Sultanda ótken komissiianyń XV otyrysynyń sheshimderin iske asyrý barysy qaraldy.
Komissiia otyrysynda Qazaqstan – Tájikstan ózara is-qimylynyń negizgi baǵyttary boiynsha QR indýstriia jáne infraqurylymdyq damý ministri Beibit Atamqulov pen Qazaqstan Respýblikasynyń ekologiia, geologiia jáne tabiǵi resýrstar ministri Maǵzum Myrzaǵaliev sóz sóiledi.
Kezdesýge qatysýshylar ekijaqty yntymaqtastyqty odan ári nyǵaitý jáne ózara tiimdi birlesken jobalardy iske asyrý boiynsha birlesken kúsh-jigerdiń nátijeliligin atap ótti. Otyrys qorytyndysy boiynsha qol jetkizilgen kelisimderdi iske asyrý týraly hattamaǵa qol qoiyldy.
