Tájikstan Eýraziia ekonomikalyq odaǵyna (EAEO) kirý máselesin áli zerttep jatyr. Resei Dýshanbeniń osy odaqqa kirgenin qalaitynyn birneshe ret málimdegen.
Tájikstannyń saýda jáne ekonomikalyq damý ministri Zavki Zavkizoda 2 tamyzdaǵy baspasóz konferentsiiasynda Dýshanbeniń EAEO-ǵa kirýi boiynsha eshqandai aldyn ala kelisim joq dep málimdedi.
"EAEO – jas birlestik. Qandai da bir odaqqa kirgisi keletin kez kelgen el paidaly-paidasyz jaqtaryn zerttep alady. Qazir kórshi elderdiń tájiribesin eskere otyryp, saraptama jasap júrmiz. EAEO-ǵa kirý týraly sheshim áli qabyldanǵan joq" dedi ministr.
Jýrnalisterdiń Tájikstan odaqqa shamamen qai ýaqytta kirý múmkin degen saýalyna Zavki Zavkizoda úkimettiń qashan jáne qandai sheshim qabyldary ázirge belgisiz dep jaýap berdi.
Eýraziia ekonomikalyq odaǵy (EAEO) – Resei, Belarýs, Armeniia, Qazaqstan jáne Qyrǵyzstan kiretin halyqaralyq uiym.
