Qyrǵyzstanda VI Dúniejúzilik kóshpendiler oiyndary bastaldy. Jarystyń alǵashqy kúninde Qazaqstan quramasy birneshe sport túrinen óner kórsetti, dep habarlaidy ult.kz.
VI Dúniejúzilik kóshpendiler oiyndary 31 tamyz ben 6 qyrkúiek aralyǵynda Qyrǵyzstanda ótýde. Qazaqstan quramasy jarystyń baǵdarlamasyna engizilgen 42 sport túrinen 152 sportshymen qatysyp jatyr.
Oiyndardyń ashylý saltanatynda Qazaqstannyń memlekettik týyn kókpardan álem chempiony, ulttyq quramanyń kapitany Turǵanbek Qurmanbek alyp shyqty.
Jarystyń alǵashqy kúninde qazaqstandyq sportshylar ordo, toǵyzqumalaq, kýrash, goresh jáne mongol boh sport túrlerinen synǵa tústi.
Toǵyzqumalaq boiynsha jarystar 6 qyrkúiekke deiin jalǵasady. Al asyq atýdan aqtyq oiyndar 2 qyrkúiekke josparlanǵan.
Kýrashtan beldesken Nurdáýlet Jarylǵapov irandyq sportshydan jeńildi. Mongol bohta Erasyl Amangeldi, al goreshte Madiiar Abdrahmanov qarsylastaryna ese jiberdi. Osy úsh kúres túrinen Qazaqstan quramasy úshin jarys aiaqtaldy.
2 qyrkúiekte qazaqstandyq sportshylar kókpar, kókbóri, er eńish (aýdaryspaq), alysh, ovari, mangala, toǵyzqumalaq, at marafony, ordo, qusbegilik, jamby atý, dástúrli sadaq atý, taiaq tartý, arqan tartý, sýmo, strongmen jáne omyrtqa syndyrý sport túrlerinen jarys jolyna shyǵady.
