Vengriianyń Dior qalasynda ótken Dúniejúzilik robottar olimpiadasynan qazaqstandyq ziiatkerler quramasy úshinshi oryn aldy. Qola medal iegeriniń biri Almaty qalasy fizika-matematika baǵytyndaǵy Nazarbaev Ziiatkerlik mektebiniń oqýshysy Liýbov Dýdchenko. Ol taldyqorǵandyq qurdastarymen bir quramada óner kórsetip, shyǵarmashylyq sanatynda baq synaǵan bolatyn, dep habarlaidy "Ult aqparat".
«Finalǵa jetý úshin aldymen, qalalyq, sosyn respýblikalyq, odan keiin quramaǵa ený kezeńderi bar. Osynyń barlyǵynan ótkennen keiin ǵana álemdik dodaǵa attana alasyń. Bul – úlken eńbek. Týra osy jarysqa men 8-shi synypta da qatystym. Biraq, sońyna deiin jete almaǵan edim. Ol kezde komandamyz respýblikalyq kezeńnen III oryn aldy. Eki jyl buryn respýblika boiynsha III oryn alsaq, endi biyl álem boiynsha qola medal ielendik», - dedi Liýbov Dýdchenko.
Onyń aitýynsha, komandalastarymen qurastyrǵan robot alǵashynda oiyndaǵydai shyqpai, biraz alańdatqan. Biraq jarystyń masshtaby, ár elderden kelgen myqty básekelester qazaqstandyq oqýshylardyń jigerin eselendirse kerek. Halyqaralyq jarystyń aqtyq máresine álemniń 73 elinen 424 komanda qatysypty.
«Koreia, Japoniia, Germaniiadan kelgen kil myqty komandalar boldy. Shynymdy aitsam, robot qurastyrýǵa arnalǵan birinshi kúnniń sońynda qatty ýaiymdadyq. Sebebi, qurastyrý barysynda qiyndyqtar týyp, qolymyzdan keler me eken, eń bolmaǵanda úzdik ondyqqa ensek eken dep oiladyq. Biraq, ertesinde ózimizdi jinaqylap, qaitadan iske kiristik. Marapattaý saltanatynda bizdi, elimizdi atap shaqyrǵan sát bárinen erekshe. Týymyzdy tike ustap, sahnaǵa júgirip shyqtyq. Armanym – Qazaqstandy álemge áigili etý. Aqyryndap oryndalyp jatqandai», - dedi Liýbov Dýdchenko.
Dúniejúzilik robottar olimpiadasy – 2004 jyldan bastap 10-21 jas aralyǵyndaǵy oqýshylar men stýdentter arasynda ótetin halyqaralyq jarys. Jyl saiyn Olimpiadaǵa 2 myńnan astam daryndy bala qatysady. Biylǵy jarysqa «Aqyldy qalalar» taqyryby bekitilgen. Qatysýshylarǵa bolashaqtyń qalasyn qurýdaǵy jańa tujyrymdamalar, ideialar men tehnologiialar usyný mindettelgen.
