Úndistandaǵy jaǵdai kez kelgen memlekette qaitalanýy múmkin. Koronavirýstyń jańa shtammy óte qaýipti. Bul týraly Dúniejúzilik densaýlyq saqtaý uiymynyń Eýropa biýrosynyń direktory Hans Kliýge málimdedi, dep habarlaidy Sputnik Qazaqstan.
"Bir mańyzdy máseleni túsiný kerek, Úndistandaǵy jaǵdai kez kelgen memlekette qaitalanýy múmkin. Jeke qorǵanys sharalary jeńildetilgende, buqaralyq sharalar ótkende jáne vaktsinalaý tómen bolǵan kezde ár elde koronavirýstyq daýyl kóterilýi múmkin", - deidi Kliýge.
Al DDU-nyń tótenshe jaǵdailarǵa daiyndyq jónindegi baǵlarlamasy jetekshisiniń mindetin atqarýshy Igor Pereginetstiń aitýynsha, ǵalymdar koronavirýstyń úndistandyq shtammyn áli de zerttep jatyr.
"Qazirgi kezde biz bir nárseni bilemiz. Osy virýstaǵy eki mýtatsiia emdelýge qajetti antidenelerdiń tiimdiligin tómendetedi. Sondai-aq, koronavirýspen aýyryp shyqqannan keiin adam aǵzasynda bólinetin antidenelerdi álsiretedi. Degenmen, zertteý jumystary jalǵasyp jatyr. Sondyqtan virýstyń dál osy shtammy, dál osy mýtatsiiasy aýrýdyń órship ketýine sebep boldy ma, joq pa, ony dóp basyp aitý qiyn", - dep atap kórsetti Pereginets.
Aita keteiik, buǵan deiin ǵalymdar Úndistannyń Batys Bengaliia shtatynda koronavirýstyń B.1.618 jańa shtammyn anyqtaǵan bolatyn. Osy eldiń epidemiologiia professory Madhýra Paidyń aitýynsha, jańa shtammda úsh birdei mýtatsiia bar. Sol sebepti virýs jyldam taralady.
Dúniejúzilik densaýlyq saqtaý uiymynyń málimetine sáikes, koronavirýstyń úndistandyq shtamy Eýropanyń 10-nan astam elinde tirkeldi. Uiym ókilderi osy virýstyń vaktsina alǵandarǵa da, koronavirýspen aýyryp shyqqandarǵa da qaýip tóndirip turǵanyn málimdedi.
Úndistan sońǵy bir aptada koronavirýsty juqtyrǵandardyń sany jaǵynan birinshi orynnan túspei keledi. Elde kún saiyn 300 myń naýqas tirkelip, 2 myńnan astam adam qaitys bolady. Sheteldiń buqaralyq aqparat quraldarynyń aqparaty boiynsha koronavirýs qurbandarynyń sany on esege kóp bolýy múmkin.
Úndistannyń aýrýhanalarynda oryn joq. Dári-dármek pen ottegi tapshy. Al koronavirýstan qaitys bolǵandardyń máiitin dalada órtep jatyr. 29 sáýirde virýs qurbandarynyń sany kúrt ósti. Bir kúnniń ishinde 3 600 naýqas kóz jumdy.
