2025 jylǵy 4 sáýir kúni Temirbek Júrgenov atyndaǵy Qazaq ulttyq óner akademiiasynyń “Ónertaný” fakýlteti, “Kino tarihy men teoriiasy” kafedrasynyń uiymdastyrýymen qazaq ádebieti men dramatýrgiiasynyń klassigi, Qazaqstannyń Eńbek Eri, Memlekettik syilyqtyń iegeri Dýlat Isabekovtiń esimi berilgen sheberhananyń saltanatty ashylý rásimi ótti, dep habarlaidy Ult.kz.
Bul aitýly shara – kórnekti qalamgerdiń ult rýhaniiatyna qosqan ólsheýsiz úlesin ulyqtaý, onyń shyǵarmashylyq murasyn jas urpaqqa nasihattaý maqsatynda uiymdastyryldy. Atalǵan sheberhana bolashaq kinoteledramatýrgterdi daiarlaityn shyǵarmashylyq alańǵa ainalmaq.
Saltanatty rásimge elimizdiń belgili mádeniet jáne óner qairatkerleri, ziialy qaýym ókilderi, jazýshynyń týystary men jaqyndary, sondai-aq Dýlat aǵanyń shákirtteri, akademiianyń oqytýshylary men stýdentteri qatysty. Shara barysynda Akademiia rektory Arman Jýdebaev, professor, ádebiettanýshy ǵalym Qanseiit Ábdezuly, kórnekti jazýshy Smaǵul Elýbai Qazaqstannyń halyq ártisi, teatr jáne kino akteri Tuńǵyshbai Jamanqulov jáne jazýshynyń uly Estiiar Dýlatuly sóz sóilep, Dýlat Isabekovtiń qazaq dramatýrgiiasyndaǵy orny men shyǵarmashylyq murasy jóninde júrekjardy estelikter aitty.
Aýditoriiada jazýshyǵa arnalǵan arnaiy taqta men shyǵarmashylyǵyna arnalǵan burysh ashylyp, kórermenge áserli rýhani atmosfera syilady. Shara sońynda stýdentter jazýshy shyǵarmashylyǵynan úzindiler oqyp, qoiylymdar kórsetti.
Dýlat Isabekov atyndaǵy bul sheberhana – tek bir aýditoriianyń ataýy emes, ol – talantty dramatýrgtiń rýhyna taǵzym, keleshek óner ielerin shabyttandyratyn kieli keńistik bolmaq.
