Nur-Sultan prokýratýrasy qoǵam belsendisi Dýlat Aǵadildiń ólimine qatysty qylmystyq isti tergeýdi aiaqtady, dep habarlaidy "Ult aqparat" prokýratýranyń baspasóz qyzmetine silteme jasap.
Tergeý qoǵam belsendisi kóz jumǵanǵa deiingi oqiǵalardyń hronologiiasyn jasady.
"Aǵadil eshqaida ketpeý týraly qolhattyń talaptaryn oryndamai, tergeý organdarynan jaltarǵan kúdikti bolatyn, oǵan izdeý jariialandy. Osy sebepterge bailanysty sot bultartpaý sharasyn qamaýǵa almastyrdy. Osylaisha, sot sheshimin oryndaǵan politsiia qyzmetkerleri Aǵadildi ustaý jáne ony qamaýǵa alýdy zań aiasynda júzege asyrdy", - delingen habarlamada.
Baspasóz qyzmetiniń aqparatynsha, Aǵadildiń óliminiń sebepteri men mán-jaiyn tájiribeli sot-meditsinalyq sarapshylar men joǵary sanattaǵy kardiologtan quralǵan komissiia jeti tekserdi.
Olardyń qatarynda belsendiniń jaqyn týystarynyń ótinishimen tartylǵan sarapshylar da boldy.
Aǵadildiń ólimine ótkir miokard infarktisi sebep bolǵan, qan tamyrlarynyń jiyrylyp, túiilýinen qan uiyp, júrektiń sol jaq qarynshasyna tolyǵymen jetpegen.
Sarapshylar marqumnyń denesinen eshqandai jaraqat tappaǵan.
"Osyǵan bailanysty 25 mamyrda Aǵadildiń ólimine qatysty qylmystyq is qylmystyq quramnyń bolmaýyna bailanysty toqtatyldy", - dep málimdedi prokýratýradan.
Eske sala ketsek, 25 aqpanda ishki ister organdary Nur-Sultandaǵy tergeý izoliatorynda qoǵam belsendisi Dýlat Aǵadildiń qaitys bolǵanyn habarlady. Oqiǵa ornyna jetken jedel járdem brigada qyzmetkerleri er adamnyń ólimin rastady.
24 aqpan kúni keshke Aǵadil úiinen tergeý abaqtysyna jetkizilgen. Oǵan qatysty qylmystyq zańbuzýshylyq jasap, sýdia men sot otyrysyna qatysýshylarǵa til tigizgeni úshin qylmystyq is qozǵalǵan bolatyn.
