Aqtóbede dúkenshini aiaýsyz uryp-soǵyp, pyshaqtap óltirgen sottalýshylarǵa úkim shyqty, dep habarlaidy "Ult aqparat".
Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy M.Júsipov pen A.Qanaevqa úkim shyqty. Olarǵa Qylmystyq kodekstiń «Qaraqshylyq», «Adam óltirý», «Esirtki, psihotroptyq zattarmen, sol tektestermen ótkizý maqsatynsyz zańsyz jumys isteý» baptary boiynsha aiyp taǵylǵan bolatyn.
Is materialyna súiensek, 2019 jyldyń tamyz aiynda M.Júsipov jáne onyń tanysy A.Qanaev Qarǵaly aýdanyndaǵy «Aqniet» dúkenin tonaýdy kózdegen. Ekeýi dúkenshige birneshe ret pyshaq suǵyp, sol jerde 180 myń teńgeden astam aqshany alyp ketti. Olar oqiǵa ornynan izin sýytqan.Sol kúni M.Júsipovtyń úiin tintý kezinde esirtki zaty tárkilendi. Ustalǵan A.Qaniev ishinara kinásin moiyndady.
«A.Qaniev Qylmystyq kodekstiń «Qaraqshylyq», «Adam óltirý» baptarymen kináli dep tanylyp, 16 jylǵa bas bostandyǵynan aiyrý jazasy taǵaiyndalsyn. Jazasyn qaýipsizdigi joǵary túzetý mekemesinde ótesin. M. Júsipov «Qaraqshylyq», «Adam óltirý», «Esirtki, psihotroptyq zattarmen, sol tektestermen ótkizý maqsatynsyz zańsyz jumys isteý» baptary boiynsha aiypty dep tanylyp, 20 jylǵa bas bostandyǵynan aiyrylsyn. A.Qanievten moraldyq zalal retinde 4 million, M.Júsipovten 4 million teńge óndirilsin», - dedi úkimdi jariia etken sýdia Qiianat Myrzabekov.
Sot úkimi zańdy kúshine engen joq.
