Ortalyq kommýnikatsiialar ortalyǵynda ótken onlain brifingide QR DSM taýarlar men kórsetiletin qyzmetterdiń sapasy men qaýipsizdigin baqylaý komitetiniń Tóraǵasy Timýr Sultanǵaziev «qupiia» sport chempionattaryn ótkizý týraly suraqqa jaýap berdi, dep habarlaidy QazAqparat.
Onlain brifing barysynda fýtzal boiynsha Qazaqstan kýbogy jasyryn jarys ótkizip jatqandyǵy týraly suraq qoiyldy. Bul aqparat áleýmettik jelilerde qyzý talqylanýda. Komandalar oinai bastady, biraq Federatsiiadan nátijelerdi jariialamaý jáne týrnirlerdi jarnamalamaý týraly nusqaý alǵan. QR DSM taýarlar men kórsetiletin qyzmetterdiń sapasy men qaýipsizdigin baqylaý komitetiniń Tóraǵasy Timýr Sultanǵaziev bas sanitarlyq dárigerdiń buiryǵy boiynsha sport komandalaryna daiyndalýǵa tyiym salynbaǵanyn atap ótti.
«Jumys isteitin sport ǵimarattary bas sanitarlyq dárigerdiń sheshimine sáikes tekserilýi kerek. Karantin rejimin buzýdyń naqty faktileri boiynsha aqparat ortalyq apparat komitetine tikelei túsken joq. Eger mundai jaǵdai oryn alsa, qaýlyny qai óńirdiń qandai sport komandasy buzǵanyn aityp ótý kerek», - deidi QR DSM taýarlar men kórsetiletin qyzmetterdiń sapasy men qaýipsizdigin baqylaý komitetiniń Tóraǵasy Timýr Sultanǵaziev.
Ol adamdar kóp jinalatyn sport sharalaryn uiymdastyrý týraly sóz qozǵaýǵa áli erte ekenin aitty.
«Biz epidemiologiialyq jaǵdaidyń, ásirese shetelde, óte shielenisti bolyp jatqanyn kórip otyrmyz. Kóptegen sport jarystar sheteldik sportshylardyń qatysýyn da kózdeidi. Sportshylar arasynda da koronavirýs juqtyrǵan jaǵdailar bolǵanyn bilemiz. Tiisinshe, búgingi tańda mundai másele vedomstvoaralyq komissiia deńgeiinde sheshiledi», - deidi ol.
