Densaýlyq saqtaý ministrligi Vaktsinalaý týraly elektrondy pasporttardy qoldan jasaý jaǵdailaryn habarlady. Bul rette jalǵan tólqujattardy túpnusqadan ajyratý múmkin emes, dep habarlaidy QazAqparat.
«Kei adamdar vaktsinalaý týraly elektrondy pasport satyp alýǵa da ótinish bildirgen. Jeke azamattar da áleýmettik jelilerge jáne densaýlyq saqtaý ministrligine júginip, vaktsinalaý pasportyn satý faktileri bolǵanyn aitty. Biz óz tarapymyzdan aqparattyq júie turǵysynan derekterdiń durystyǵyna qaraimyz. Qalai bolǵanda da meditsina uiymynyń qyzmetkerleri derekterdi aqparattyq júiege engizedi. Bul – olardyń jaýapkershiligi. Sondai-aq, jergilikti atqarýshy organdar deńgeiinde kim jáne qalai satqanyn anyqtaý boiynsha jumys júrgizilýde. Ázirge búkil el boiynsha málimet jinaqtaǵan joqpyz», - dedi QR DSM elektrondyq densaýlyq saqtaýdy damytý departamentiniń direktory Beibit Esenbaev tilshilerge bergen suhbatynda.
Onyń aitýynsha, kei azamattar qandai da bir meditsina qyzmetkerlerine (shyn máninde meditsinalyq uiymdarda jumys isteitin) júginetin jaǵdailar da bolady. Olar syiaqyǵa derekterdi aqparattyq júiege engizýdi suraidy.
«Munda aiyrmashylyǵyn tabý (vaktsinalaý pasportynyń - red.) múmkin emes. Óitkeni, vaktsinany jasaǵan dárigerge aqparattyq júie zańdy túrde qoljetimdi jáne osy derekterdi engize alady. Bul da – onyń meditsinalyq uiymnyń qyzmetkeri retindegi jaýapkershiligi. Jalǵan derekterdi engizgeni úshin de belgili bir jaýapkershilik qarastyrylǵan», - dedi maman.
Departament direktory jalǵan pasporttarǵa qatysty aqparattyq júiede derekterdi kim, qashan júrgizgeni tekserilip jatqanyn aitty. Qate aqparat engizý faktileri meditsina uiymdary men densaýlyq saqtaý basqarmasy deńgeiinde de anyqtalýǵa tiis.
«Jergilikti jerlerde adamdarǵa vaktsinanyń shynymen salynyp jatqanyn tekserý kerek. Qazir emshara kabinetine kamera ornatý boiynsha talaptar joq, biraq biz bul máseleni qarastyryp jatyrmyz», - dep jaýap berdi B.Esenbaev
Beibit Esenbaev elektrondy úkimettiń mobildi qosymshasynda vaktsinalaýdyń elektrondy pasporty jańartylyp, formasy ózgeretinin eske saldy.
«Vaktsinalaý pasporty buryn úsh tilde úsh bet bolatyn. Qazir úsh tilde aqparat beriletin bir bet bolady. Sondai-aq, azamattyń jeke málimeti týraly aqparatty – tólqujat nómiri, týǵan jylyn jáne QR-kod qosamyz. QR-kodty skanerlep, Densaýlyq saqtaý ministrliginiń Memlekettik resýrsyna kirýge bolady, onda osy elektrondy pasporttyń túpnusqa nemese jalǵan ekenin tekserýge bolady», - dep atap ótti Beibit Eńsebaev.
