Qazaqstannyń tabiǵatty qorǵaý qyzmetteri jańa zamanaýi quraldarmen jabdyqtalady, dep habarlaidy "Ult aqparat" QR Ekologiia, geologiia jáne tabiǵi resýrstar ministrligine silteme jasap.
«Brakonerlerdi ustaýda jedel sharalar qabyldaý maqsatynda QR IIM oblystyq aýmaqtyq inspektsiialardyń, «Ohotzooprom» ÓB» RMQK jáne erekshe qorǵalatyn tabiǵi aýmaqtardyń qyzmettik avtokólikterin arnaiy kólik quraldary sanatyna jatqyzý jóninde jol qozǵalysy erejelerine ózgerister engizedi. Nátijesinde, bul avtokólikter arnaiy daýys zoraitqysh qurylǵymen, arnaiy dabylmen jáne jasyl tústi jolaqtarmen jabdyqtalady», - delingen ministrlik habarlamasynda.
Sondai-aq, tabiǵatty qorǵaý qyzmetterin materialdyq-tehnikalyq jaraqtandyrýdy jaqsartý úshin jańa normativter ázirlengen.
«Munda brakonerlikke qarsy kúreske arnalǵan qazirgi zamanǵy tehnologiialar men quraldar – drondar, keýde kameralary, arnaiy tehnika, elektrshoker, travmatikalyq qarý, jeke qorǵanys quraldary jáne t.b. engizýdi kózdelgen. Qazirgi ýaqytta atalǵan normativter tiisti memlekettik organdarda talqylanyp jatyr», - dep habarlady Ekologiia, geologiia jáne tabiǵi resýrstar ministrligi.
Eske sala ketsek, 25 qazanda Qyzylorda oblysy Jalaǵash aýdanynda brakonerdiń izine túsken qoryqshy Ádil Kenjeǵulov mert boldy. Ol - jyl basynan beri tabiǵatty qorǵaý jolynda qaza tapqan úshinshi inspektor.
Odan bólek, QR Ekologiia, geologiia jáne tabiǵi resýrstar ministrligi tabiǵatty qorǵaý inspektorlarynyń qarý qoldaný quzyretin ózgertýdi usynyp otyr.
