Marapat adamdy ósirýi de, óshirýi de múmkin. Mundai pikirdi Qazaqstannyń halyq ártisi, eki dúrkin Memlekettik syilyqtyń iegeri Doshan Joljaqsynov «Otan» ordenin saltanatty túrde tabys etý sharasynda aitty, dep habarlaidy QazAqparat.
«Men úshin búgin- erekshe kún. Eńbektiń baǵalanǵany úlken sharýa. Marapat keide adamdy ósirýi de, óshirýi de múmkin. Sondyqtan abai bolǵan abzal. Desekte, osynyń bári erteńgi kúniń baǵyt- baǵdaryna sebebin tigizetinine sengim keledi. Jalpy, óner, mádeniet, ádebiet adamynyń jazǵan, túsirgen, aitqan dúnielerin halqy qury maqtamai, ornymen baǵasyn berip otyrsa, óner adamynyń mereii ústem bolady. Ónerdiń tuǵyry ol- shabyt. Oǵan kún, tún demei izdenýiń kerek. Osynyń bári rahat ómir. Birinshiden, meniń tyrnaq aldy dúnielerime rizashylyq bildirgen, túsinip qaraǵan kórermenderime alǵys aitqym keledi»,- deidi Doshan Joljaqsynov.
Sonymen qatar, ol bul jetistigi janyndaǵy shyǵarmashylyq adamdar men otbasynyń arqasy ekenin jetkizdi.«Álemdik tendentsiiada kez kelgen ult, násil óziniń tóltýmalyq tuǵyryn izdeýmen kúresip keledi. Bul qazirgi ǵasyrda aiqyn kórinýde. Bul jańa betburys dep túsinemin. Osy betburys bizdiń elde erterek bastalǵandai. Óitkeni Elbasymyz aitqan «Rýhani jańǵyrý», Qasym-Jomart Toqaevtyń Abai týraly aýqymdy maqalasy munyń bári bizge kúsh-qýat beredi. Búgingi jetistigim janymdaǵy shyǵarmashylyq adamdarynyń úlesi, úidegi jarymnyń, balalarymnyń úlesi dep bilemin», - dedi «Otan» ordenin iegeri.
Aita keteiik, bul mártebeli marapat tanymal akterge ulttyq mádenietti, kinematografiiany jáne teatr ónerin damytýdaǵy airyqsha úlesi úshin Qazaqstan Respýblikasynyń Prezidenti Qasym-Jomart Toqaevtyń Jarlyǵymen berildi.
Búgin Almatyda Memlekettik hatshy Qazaqstannyń halyq ártisi Doshan Joljaqsynovqa «Otan» ordenin saltanatty túrde tabys etti.
