Qazaqstan Prezidenti Qasym-Jomart Toqaev Ulttyq bank tóraǵasy Erbolat Dosaevty qabyldady, dep habarlaidy Aqorda.
Memleket basshysy Ulttyq bank tóraǵasynyń biylǵy 9 ai ishindegi aqsha-nesie saiasatyn júzege asyrýdyń aldyn ala qorytyndylary týraly, álemdik ekonomikany qaita qalpyna keltirýdiń qarqyny jáne ony pandemiiaǵa deiingi deńgeige jetkizý, sondai-aq damyǵan elderdegi ortalyq bankterdiń aqsha-nesie saiasatyn kúsheitýge kóshe bastaǵany jóninde esep berdi.
Erbolat Dosaev Prezidentke qyrkúiek aiynda jyldyq infliatsiianyń 8,9 paiyzǵa deiin qarqyn alǵany jaiynda baiandady. Ailyq infliatsiianyń artýyna aqyly qyzmetter, sonyń ishinde, eń aldymen bilim berý jáne turǵyn úilerdi jalǵa alý salalary úlken úles qosty.
Qasym-Jomart Toqaevqa Ulttyq banktiń Úkimetpen birlesip júzege asyryp jatqan infliatsiiaǵa qarsy keshendi sharalary jáne infliatsiiany boldyrmaý jónindegi monetarlyq saiasattyń negizgi baǵyttary týraly málimet berildi. Áleýmettik mańyzy bar azyq-túlik taýarlaryna qatysty baǵa biylǵy tamyz aiyndaǵy 10,4 paiyzdan qyrkúiekte 9,6 paiyzǵa deiin tómendegeni atap ótildi.
Ulttyq bank tóraǵasynyń málimeti boiynsha shikizat taýarlary baǵasynyń qymbattyǵyna, tutynýshylar tarapynan týyndaǵan shekteýlerge bailanysty álemdegi tutyný baǵalary eń joǵary deńgeide saqtalyp otyr. Kezdesý barysynda jyl sońyna deiin jáne 2022 jylǵa arnalǵan energiia tasymaldaýshylar baǵasyna qatysty boljamdar usynyldy.
Prezidentke Ulttyq banktiń altyn-valiýta rezervteri men Ulttyq qor aktivteriniń jai-kúii, sondai-aq valiýta naryǵyndaǵy ahýal jóninde baiandaldy.
Sonymen qatar Memleket basshysynyń tapsyrmalaryn oryndaý aiasynda Ulttyq tólem júiesin damytýdyń jáne tsifrlyq biometriialyq sáikestendirýdiń ulttyq platformasyn qurýdyń aldyn ala nátijeleri týraly málimet berildi.
