Foto: Akorda.kz
Prezident Almaty qalasynyń ákimi Erbolat Dosaevty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna Almatynyń biylǵy 11 aidaǵy áleýmettik-ekonomikalyq damýynyń aldyn ala qorytyndylary jóninde esep berildi.
Qasym-Jomart Toqaevqa atalǵan kezeń ishinde qysqa merzimdi ekonomikalyq indikator 13 paiyzǵa artqany týraly baiandaldy. Memlekettik biýdjet túsimderi 4,9 trillion teńgege jetti. Ósim kórsetkishi 34,5 paiyzdy qurady. Qarasha aiynda jyldyq infliatsiia 10,5 paiyzǵa deiin báseńdedi. Jalpy, jyl qorytyndysy boiynsha elimizdegi eń iri qala ekonomikasynyń ósimi 6,5 paiyz deńgeiinde bolady degen boljam jasalyp otyr (2022 j. – 5,0%).
Prezidentke negizgi kapitalǵa quiylǵan investitsiianyń jalpy kólemi 20 paiyzǵa ulǵaiǵany jaiynda aqparat berildi. Jeke investitsiia 30,3 paiyzǵa artyp, 1,4 trillion teńgege jetken. Jyl basynan beri qala ekonomikasyna barlyǵy 1,53 trillion teńge salyndy.
Erbolat Dosaevtyń aitýynsha, Memleket basshysynyń tapsyrmasymen Almatyda qoǵamdyq kólikti damytý jáne ekologiialyq talaptarǵa sáikestendirý úshin keshendi jumystar júrgizilip jatyr. Biyl qalanyń avtobýs parki ekologiialyq taza 1150 jańa avtobýspen tolyqty. Onyń 550-in jeke tasymaldaýshylar satyp alǵan. Sońǵy 11 jylda alǵash ret trolleibýs parki de jańartyla bastady. Búginde 100 trolleibýs satyp alynǵan, qosymsha taǵy 100-in satyp alý arqyly kelesi jyly trolleibýs parki tolyqtai jańarady.
Sonymen qatar Qasym-Jomart Toqaevqa jol-kólik infraqurylymynyń damýy týraly baiandaldy. Qalanyń 70 kóshesine 25 shaqyrym jańa jol salyndy jáne 200 shaqyrym jolǵa ortasha jóndeý jumystary júrgizildi.
Budan bólek, Prezidentke áleýmettik infraqurylymdy jańǵyrtýǵa qatysty tapsyrmalarynyń oryndalýy týraly málimet berildi. Densaýlyq saqtaý salasynda meditsinalyq-sanitariialyq alǵashqy kómektiń (MSAK) jańa biryńǵai standarty belsendi túrde engizilýde. Almatyda «Jaily mektep» ulttyq jobasy aiasynda 37,1 myń oryndyq 22 mekteptiń qurylysy men jobalaý jumystary bastaldy.
Jyl basynan beri NEET sanatyndaǵy 36,7 myń jas azamat jumysqa ornalastyrylǵan. Onyń 82 paiyzy – turaqty jumys orny. Qajetti mamandyqtardy oqytýdyń qysqa merzimdi kýrstary jáne Jobfair365 bos jumys oryndarynyń tsifrlyq platformasy iske qosylǵan. Jastar úshin 8 komiýniti-ortalyǵy ashylǵan.
Erbolat Dosaevtyń aitýynsha, Prezidenttiń qalany kógaldandyrý jónindegi tapsyrmasynyń oryndalý barysy erekshe baqylaýda. Jyl basynan beri 276 myń túp kóshet otyrǵyzyldy. Jyl sońyna deiin olardyń sany 320 myńǵa jetkizilmek. Almatydaǵy saiabaqtar aýmaǵy 397 gektarǵa ulǵaidy.
Kezdesý sońynda Qasym-Jomart Toqaev megapolis ekonomikasyn odan ári ártaraptandyrý, investitsiia tartý, shaǵyn jáne orta biznesti qoldaý sharalaryn kúsheitý jóninde naqty tapsyrmalar berdi. Sondai-aq ákimge qoǵamdyq kólikti ekologiialyq talaptarǵa sáikestendirý jáne Almatynyń kólik qatynastary júiesin damytý mindetin júktedi.
