Azyq-túlik qaýipsizdigin qamtamasyz etý jáne importqa táýeldilikti tómendetýge 400 mlrd teńge baǵyttalady. Bul týraly búgin Úkimet otyrysynda QR Ulttyq bank tóraǵasy Erbolat Dosaev aitty, dep habarlaidy QazAqparat.
«Memleket basshysy bastama jasaǵan daǵdarysqa qarsy sharalardyń birinshi toptamasy aiasynda mynadai jumys júrgizildi. Birinshiden, ekonomikanyń basym salalaryn jeńildikpen kreditteý baǵdarlamalary arqyly osy jylǵy 10 sáýirdegi jaǵdai boiynsha, bankter jalpy somasy 422,2 mlrd teńgege 619 ótinim qabyldady. 292,2 mlrd teńge somaǵa 470 joba maquldandy. 153 mlrd teńge somaǵa 352 qaryz berildi», - dedi Ulttyq bank basshysy.
Onyń atap ótýinshe, Ulttyq bank osy baǵdarlamany qarjylandyrýdy 1 trln teńgege deiin 400 mlrd teńgege ulǵaitý týraly sheshim qabyldady. Ol azyq-túlik qaýipsizdigin qamtamasyz etýge jáne importqa táýeldilikti tómendetýge baǵyttalatyn bolady.
«Qazaqstan Respýblikasynyń Prezidenti Qasym-Jomart Toqaevtyń tapsyrmasy boiynsha tótenshe jaǵdaidyń engizilýinen zardap shekken ShOB sýbektilerin jáne jeke kásipkerlerdi qoldaýǵa arnalǵan jeńildikpen kreditteý baǵdarlamasy ázirlenip, iske asyryla bastady. Baǵdarlama aiasynda bankterge 12 aiǵa deiingi merzimmen jalpy somasy 600 mlrd teńgege negizdelgen salymdar bólindi. Úsh aida júzege asyrylatyn qarajatty igerý bastalyp ketti. Kásipkerler 647 ótinim berdi, 17,3 mlrd teńge somasyna 45 qaryz berildi», - dedi Erbolat Dosaev.
