Búgin Elbasynyń tóraǵalyǵymen ótip jatqan Úkimettiń keńeitilgen otyrysynda QR Premer-Ministriniń orynbasary Erbolat Dosaev «Saryarqa» gaz qubyry jobasy aiasynda qansha jumys orny qurylatynyn aitty, dep habarlaidy "Ult aqparat".
«Ótken jyly jeltoqsanda «Saryarqa» gaz qubyrynyń qurylysyn bastaýǵa ruqsat berdińiz. Búginde qurylysty qarjylandyrýdyń máseleleri sheshelip, bas merdiger anyqtaldy. Jobany júzege asyrý men gaz qubyryn paidalaný kezeńinde 1 900-ge jýyq jańa jumys orny qurylady», - dedi E. Dosaev.
Budan buryn habarlanǵandai, Nursultan Nazarbaevtyń qatysýymen ótken indýstriialandyrýdyń ekinshi besjyldyǵy aiasyndaǵy jalpy ulttyq telekópir barysynda «Saryarqa» gaz qubyrynyń qurylysyna bastaý berildi.
Sonymen qatar, jaqynda QR Energetika ministri Qanat Bozymbaev atalmysh joba aiasynda qubyr tartý jumystary týraly baiandady.
