Ulttyq bank tóraǵasy Erbolat Dosaev Úkimet otyrysynda kapitaldy negizsiz shyǵarýǵa qarsy is-qimyl qalai uiymdastyrylatynyn túsindirdi, dep habarlady QazAqparat.
«Úshinshi baǵyt kapitaldy negizsiz shyǵarýǵa qarsy is-qimyl bolyp tabylady. Memleket basshysy tótenshe jaǵdai rejiminiń engizilýine bailanysty kapitaldy shetelge shyǵarý, onyń ishinde jalǵan mámileler jasaý arqyly shetelge shyǵarý táýekeliniń údei túskenin atap ótti», - dedi Ulttyq bank basshysy.
Osyǵan bailanysty 10 qańtarda Ulttyq bank Qarjylyq monitoring agenttigimen jáne Qarjy naryǵyn retteý jáne damytý agenttigimen birlese otyryp elden zańsyz aqsha shyǵarýǵa baqylaýdy kúsheitý boiynsha birlesken buiryq qabyldaǵan.
«Joǵaryda atalǵan buiryqqa sáikes operatsiialar júrgizýge arnalǵan ótinimder boiynsha is-qimyldar algoritmi qabyldandy, sondai-aq kúsheitilgen qarjylyq monitoring júrgizilýi tiis transshekaralyq operatsiialardyń tizbesi bekitildi. Talaptar aiqyn buzylǵan jaǵdaida, mundai operatsiialar jedel toqtatylatyn bolady. Qabyldanyp jatqan sharalar aqshany jylystatýǵa qarsy kúrestiń eń úzdik álemdik praktikasyna negizdeledi jáne KYC (know your client) qaǵidattaryn tolyqqandy engizedi», - dedi Erbolat Dosaev.
Sondai-aq, ol atalǵan sharalar kapitaldyń transshekaralyq aǵyndarynyń barynsha aiqyndylyǵyn qamtamasyz etýge múmkindik beretinin atady.
«Rezidentter men beirezidentterdi qosa alǵanda, syrtqy ekonomikalyq qyzmettiń adal qatysýshylary men investorlardyń halyqaralyq operatsiialar júrgizýi kezinde óz quqyqtaryna qysym jasalmaitynyn jáne shekteý qoiylmaitynyn rastaǵym keledi», - dedi Ulttyq bank tóraǵasy.
