Ulttyq bank jyl sońyna deiin aqsha-kredit talaptaryn qatańdatý sharalaryn qolǵa alýy múmkin. Bul týraly búgin bank tóraǵasy Erbolat Dosaev málimdedi, dep habarlaidy Sputnik Qazaqstan.
Dosaevtyń aitýynsha, biyl shildede ailyq infliatsiia 0,2 protsentti quraǵan. Jyldyq infliatsiia 5,4 protsent deńgeiinde saqtaldy. Jemis-kókónis baǵasynyń maýsymdyq tómendeýine qaramastan, jazǵy kezeńge tán infliatsiialyq protsess baiqalmaidy.
"Bazalyq stavkanyń qazirgi deńgeii men aqsha-kredit talaptary infliatsiiany biyl nysanaly 4-6% dálizinde saqtaýdy qamtamasyz etedi. Alaida álemdik naryqta táýekel deńgeiiniń ósýi men tutynýshylyq suranystan proinfliatsiialyq qysymnyń kúsheiýin eskere otyryp, Ulttyq bank jyldyń sońyna deiin aqsha-kredit talaptaryn qatańdatý sharalaryn qabyldaitynyn joqqa shyǵarmaidy", - dedi Dosaev úkimet otyrysynda.
Ulttyq bank tóraǵasy valiýta naryǵyndaǵy ahýal kóp jaǵdaida syrtqy faktorlarǵa táýeldi ekenin atap ótti.
"12 tamyzdaǵy jaǵdai boiynsha teńge baǵamy jyl basynan beri 0,9 protsentke álsirep, bir dollar úshin 387,48 teńgeni qurady", - dedi ol.
31 shilde men 7 tamyz aralyǵynda munaidyń álemdik baǵasy barreline 65,2 dollardan 56,2 dollarǵa deiin kúrt tómendegen.
"Bul AQSh prezidentiniń Qytai taýarlaryna baj engizetinin málimdegennen soń boldy. 12 tamyzdaǵy jaǵdai boiynsha munai baǵasy barreline 58,5 dollarǵa deiin ósti. Resei rýbli aidyń basynan bastap 12 tamyzǵa deiin bir AQSh dollary úshin 63,4 rýblden 65,4 rýblge deiin, 3,2 protsentke álsiredi", - dedi Dosaev.
Ulttyq banktiń altyn-valiýta rezervteri 1 tamyzda 27 milliard 700 million dollardy quraǵan.
"Ol ekinshi deńgeili bankterdiń valiýtalyq svopty jabýymen jáne úkimettiń syrtqy boryshyn óteý nátijesinde shildede 1,8 protsentke tómendedi", - dedi bank tóraǵasy.
