«Aqjaiyq» Orynborda «Lokomotivpen» sońǵy oiynynda iri eseppen jeńiske jetti, dep habarlaidy "Ult aqparat".
Resei dopty hokkei federatsiiasynyń saitynan málim bolǵandai, «Orynbor» stadionynda bolǵan matchta «Aqjaiyq» birden oiyn tizginin qolǵa aldy.
Komanda surmergeni, reseilik legioner Maksim Pahomov birinshi bolyp esep ashty. Budan keiin aidyn ielerinen Sergei Romashov tarazy basyn teńestirgenimen, Sergei Bashaev, M.Pahomov jáne Qýanysh Temirálin esepti 4:1-ge jetkizdi.
Ekinshi taimda M.Pahomov tórt márte, Andrei Gýshin, Petr Gribanov bir retten mergendigimen kózge tústi. «Lokomotivten» taǵy da S.Romashov qos goldyń avtory atansa, Aleksei Badanin bir dop engizdi.
Qorytyndy esep – 10:4, «Aqjaiyqtyń» paidasynda.
Budan buryn sýperligada da óner kórsetip, ótken jyly «Aqjaiyqqa» qosylǵan Maksim Pahomov osy maýsymda qarsylastar qaqpasyna 73 dop soǵyp, úzdik kórsetkishke qol jetkizdi.
Osylaisha ekinshi topta 58 upai jinaǵan Nikolai Shavaldinniń shákirtteri finaldyq saiystarǵa beriletin eki joldamanyń birin ielenýge jaqyn tur. 56 upaimen ekinshi orynda turǵan «Znamia-Ýdmýrtiia» búgin sońǵy básekesinde «Dinamo-Qazan-2» komandasyn jeńse, «Aqjaiyqty» basyp oza alady. Oǵan qosa «Kirovets» (Ýfa, 52 upai) komandasy da joldamadan úmitti. Ol áli úsh oiyn ótkizedi. Al «Maiak» (Krasnotýrinsk) búgin Pervoýralskide «SKA-Sverdlovsk» komandasynan 2:5 esebimen jeńilis taýyp, 54 upaimen joldamadan tys qaldy.
Joǵary ligada úsh top bolsa, sonyń árqaisysynan qos úzdik komanda finaldyq týrnirge qatysady.
«Aqjaiyq» sport klýbynyń direktory Merei Qanibetovtyń aitýynsha, barlyǵy alty komanda sýperligaǵa beriletin jalǵyz joldamany sarapqa salady.
Finaldyq saiystyń ótetin orny keiin anyqtalady.
1976 jyly kásibi klýb retinde qurylǵan «Aqjaiyq» buǵan deiin óz tarihynda tórt dúrkin finaldyq saiystardyń qola júldegeri atanǵan edi.
Eske sala keteiik, budan buryn «Aqjaiyqtyń» óz tobynda kósh basyna kóterilgenin jazǵan bolatynbyz.
