AQSh prezidenti Donald Tramptyń 71 jastaǵy inisi Robert Tramp Niý-Iork aýrýhanasynda jatyp qaitys boldy.
"Birtýar baýyrym Robert búgin túnde dúnieden ozdy. Ol maǵan ini ǵana bolmai, dos ta boldy. Biz ony qatty saǵynamyz, biraq áli de kezdesetinimizge senemin. Onyń esteligi meniń júregimde máńgi bolady. Robert, men seni jaqsy kóremin. Jatqan jeriń jaily bolsyn" dedi Tramp 15 tamyz kúngi málimdemesinde.
Aq úi prezidenttiń baýyry aýyl hálde jatqanyn málimdegen soń, 14 tamyz kúni Donald Tramp Niý-Iork aýrýhanasyna soǵyp, inisiniń kóńilin surady. Ólimniń sebebi aitylmady, biraq marqumnyń maýsym aiynda bir aptadan astam aýrýhanada jatqany belgili.
AQSh-tyń 74 jastaǵy prezidenti baýyrlarynyń ishinde inisi Robert Tramppen jaqyndaý bolǵan. Biraq ekeýiniń minezi ekitúrli. Donald Tramp bir joly inisin "maǵan qaraǵanda tynyshtaý ári minezi jeńil" dep sipattaǵan.
"Robert kez kelgen adammen til tabysa alady. Bul men úshin keremet bolatyn, óitkeni kei kezderi men jaman adamnyń róline túsip qalatynmyn" dep jazǵan Donald Tramp "Kelisý óneri" dep atalatyn 1987 jylǵy bestseller kitabynda.
Robert Tramp 1948 jyly týǵan. Ol – otbasyndaǵy bes balanyń eń kishisi. Tramp otbasynyń kenjesi mansabyn Ýoll Stritten (Niý-Iorktegi qarjy ortalyǵy ornalasqan aýdan – red.) bastaǵan, biraq keiinnen Trump Organization kompaniiasynyń joǵary laýazymyna ie bolǵan.
Keiingi jyldary Robert Tramp kózge kóp túspei, aǵasynyń qoldaýshysy bolyp júrdi.
