Foto: JI\dalanews.kz
Qazaqstanda dombyrany ushaq bortynda alyp júrýge resmi túrde ruqsat berý josparlanyp otyr. Bul úshin Kólik ministrligi áýe tasymaly qaǵidalaryna tiisti ózgerister men tolyqtyrýlar engizýde, dep habarlaidy Ult.kz.
Ministrlik málimetinshe, jańa joba azamattardyń kóptep túsken ótinishteri negizinde ázirlengen. Endi alǵash ret normativtik deńgeide jolaýshylarǵa mýzykalyq aspaptardy, onyń ishinde dombyra men qobyzdy arnaiy fýtliarda ushaq salonyna qol júgi retinde alyp kirý quqyǵy berilmek.
Alaida belgili bir talaptar saqtalýy tiis: aspaptyń ólshemi 110×35×30 santimetrden, al salmaǵy 10 keliden aspaýy qajet.
Jańa tártipke sáikes, eger jolaýshy ózimen birge tek bir mýzykalyq aspap — mysaly, dombyra alyp júrse, ol qol júgi retinde tegin tasymaldanady. Al aspap qosymsha júk retinde rásimdelse nemese belgilengen normadan asyp ketse, onda artyq salmaq úshin áýe kompaniialarynyń qoldanystaǵy tarifteri boiynsha aqy alynady.
Vedomstvo ókilderiniń aitýynsha, bul ózgerister jolaýshylar quqyǵyn qorǵaýdy kúsheitip, áýe kóliginde mýzykalyq aspaptardy tasymaldaý tártibin naqtylaýǵa baǵyttalǵan. Qujatty qabyldaý 2026 jyldyń mamyr aiynyń sońyna deiin josparlanyp otyr.
Aita keteiik, buǵan deiin ministrlik dombyrany ushaq bortynda alyp júrýge ruqsat berý máselesi qaralyp jatqanyn habarlaǵan edi.
