Foto: Aqorda
Qasym-Jomart Toqaev 6 shildede atalyp ótetin Ulttyq dombyra kúnimen quttyqtady, dep habarlaidy Ult.kz.
Memleket basshysy quttyqtaýyn X áleýmettik jelisindegi paraqshasynda jariialady.
"Dombyra – ult bolmysy, halyq qazynasy. «Qazaq – naǵyz qazaq emes, naǵyz qazaq – dombyra». Ásirese, óskeleń urpaqtyń dombyraǵa degen yqylasy erekshe. Jastar tól mádenietimizdi tereń túsinip, salt-dástúrimizge qurmetpen qaraidy. Bul – óte jaqsy úrdis. Óitkeni ata-babalarymyzdyń mádeni murasyn kózdiń qarashyǵyndai saqtaý – naǵyz otanshyldyqtyń kórinisi. Otanǵa súiispenshilik – memlekettiligimizdiń temirqazyǵy. Qazaqstan jastarynyń muny jaqsy túsinip, qoldaitynyna rizamyn. Memleket rýhaniiat salasyn barynsha damyta beredi. Dástúrli ónerdiń dúldúlderi Qairat Baibosynov «Qazaqstannyń Eńbek Eri», Aigúl Úlkenbaeva, Aigúl Qosanova «Qazaqstannyń halyq ártisi» ataǵyna ie boldy. Qasietti qara dombyranyń kúmbirin búkil álemge pash etip júrgen azamattarǵa alǵys aitamyn", – dep jazdy ol.
Ulttyq dombyra kúni shilde aiynyń alǵashqy jeksenbisinde atalyp ótedi.
