Foto: Májilistiń baspasóz qyzmeti
Respublica partiiasynan Májiliske depýtat bolyp sailanǵan Dinara Shúkijanova óz erkimen qyzmetinen ketti, dep habarlaidy Sputnik Qazaqstan.
Palatanyń jalpy otyrysynda Dinara Shúkijanovanyń ókilettigin merziminen buryn toqtatý týraly másele qaraldy. Buǵan deiin depýtattyń ótinishine bailanysty Ortalyq sailaý komissiiasy tiisti qaýly shyǵarǵan bolatyn.
Májilis depýtattary qaýlyny qoldap daýys berdi.
Shúkijanova Májilisten óz erkimen ketip jatqanyn málimdedi.
"Men partiia quramynda qala beremin. Óz qyzmetimdi jalǵastyramyn, halyqpen kezdesip, óńirlerde jumys isteimin. Biz alǵashynda partiialyq tizim aiasynda rotatsiia bolatynyna keliskenbiz. Meniń Májilis depýtaty qyzmetine kiriskenime de bir jylǵa jýyq ýaqyt boldy. Al qazir maǵan óndiriske oralý kerek bolyp tur. Meniń ornyma Respublica partiiasynyń múddesin laiyqty qorǵaityn adam keledi dep oilaimyn", - dedi ol Májilis kýlýarynda.
Dinara Shúkijanova - Respublica partiiasynyń teń tóraǵasy.
2023 jylǵy naýryzdan bastap Parlament Májilisiniń depýtaty boldy.
