Qazaqstannyń jetekshi infektsionist dárigeri, meditsina ǵylymdarynyń doktory Dinagúl Baesheva Qazaqstan koronavirýs infektsiiasymen kúres tásilin nelikten ózgertkenin aityp berdi, dep habarlaidy QazAqparat.
«Qazir el ishindegi «koronavirýs juqtyrǵandardy aldymen jatqyzý kerek dedi, keiin kerek emes dedi» degen ýáj aitylyp jatqanyn bilemiz. Biraq koronavirýsqa qatysty jaǵdaidyń da ózgeriske ushyrap jatqanyn eskerý kerek. Áý basta juqtyrǵandardyń bárin de tegis jatqyzdyq. Sebebi bizde múmkindik boldy. Infektsiianyń popýliatsiiaǵa ketip qalǵanyn qalamadyq. Barynsha ustap turdyq. Al qazir kontsentratsiia ulǵaiyp ketti. Kezinde adamdardy jatqyzǵan kezde keibireýler shaǵymdanyp, múlde saý ekenin de aityp, shýlasqan edi. Biraq báribir ainalyp kelgende koronavirýstyń el ishine tarap ketkenin kórip otyrmyz», - dedi Dinagúl Baesheva Densaýlyq saqtaý ministrliginiń Facebook paraqshasyndaǵy «Ministrlik habarlaidy» aidarynda.
Koronavirýsqa qatysty jaǵdaidyń ózgerýine bailanysty onymen kúresýdiń ustanymy men ádisine de ózgerister engizilgen.
«Bul – halyqaralyq standart. Keibir memleketter birden ujymdyq immýnitetti qalyptastyrýǵa kirisip ketti. Máselen Eýropa elderiniń keibiri virýs tarai bersin, tek Qarttar úiin jabamyz desti. Biraq ol elder qazir báribir ákimshilik sharalardy qoldaný kerek ekenin kesh túsinip otyr», - dedi ol.
Dinagúl Baeshevanyń sózinshe, Qazaqstan koronavirýspen kúrestiń jarqyn úlgisin birqatar memleketke kórsete bilgen.
«Al qazir biz osy kúres daǵdysyn ustanyp, tyń amaldy qoldana bilýimiz qajet. Qazir jaǵdai ózgerdi. Sol sebepti kúres tásilin de ózgertýimiz kerek. Ainalyp kelgende bul – virýspen soǵys. Virýs taktikasyn ózgertýde. Biz de kúres tásilin ózgerýimiz kerek. Qazir shý kóterilip jatyr. Sabyrǵa kelý kerek. Shý eshteńeni sheshpeidi», - dedi ol.
