Oraǵyń ótkir bolsa, qaryń talmaidy. Otanyń berik bolsa, jaýyń almaidy...
Óz ultynan qiianatty kóp kórip, áli de kósegesi kógermei kele jatqan týǵan til men jerdiń taǵdyryna qatysty dúnieni lýpamen qarai bastaǵan qandastaryma qarap, keýdemdi shattyq kerneidi. Kezinde Eýraziialyq Odaqqa qarsy bolǵan sanaýly "sarbaz" edik. Túrimizge qaramai osynda odyrańdap otyrýshy ek. Qazir qaramyz kóbeiip, qatarymyz ulǵaiypty. "Qalyń qazaq uiqydan oianǵan eken, endi bizdi jaý almas" dep, Allaǵa sansyz shúkirlik etip qoiamyn ishtei...
Biz "uiqyda" jatqanda talai kesapat sheshimder qabyldanyp ketti. Qaisybirin aitaiyq...
"Tizesi shyqqan" problemany tizbektegennen ne paida? Jáne kimge ókpeleimiz... Endigi másele, ultqa qatysty kez-kelgen dúdámál dúnieni qyraǵylyqpen suryptap, kelispeitin tusty kesip tastap otyrý kerek. Eldikti saqtaý úshin odan ózge jol joq!
Sonymen, keshe keshkilik "atyshýly" ministrmen didarlasýǵa bardyq.
Kezdesýde kóptiń kókeiin tesken kóp saýaldy men qoimastan, ózi jaiyp sala berdi. Ministrdiń sózin uqqanym boiynsha, Qazaqstan "Boloniia protsesine" múshe bolǵandyqtan, 2009-shy jyldardan bastap osy deklaratsiiasy negizinde Eýropalyq bilim berýdiń biryńǵai júiesine kóshý úshin elde myń-san joba jasalǵan. Biraq, ol jobalar is júzinde iske aspaǵan, sheshimi bekimegen soń, qaǵaz júzinde qalǵan. Álgi senimge selkeý túsirgen qujat - JOO arasynda "qańǵyp" júrgen qaǵazdardyń biri bolsa kerek.
"Boloniia protsesi" - eýropalyq biryńǵai bilim berý keńistigine qarai oiysyp, ár eldiń ulttyq bilim berý júiesin soǵan ikemdeidi. Dál qazir eýropalyq biryńǵai bilim berýdiń bolondyq tásilin synap jatqandar kóp álemde. Kásibi tehnikalyq bilim berýge, aqparattandyrý, oqý baǵdarlamasyna, nesielendirýge qatysty kóńil tolmaýshylyq bar. Tipti kei álemdik ǵalymdar Bolon protsesin - "proval" dep te atady... Sondyqtan, meniń oiymsha bilim berý salasy boiynsha álemdik integratsiialyq úderisten qalmaý qajet, biraq, onyń ózin baiqap, ábden taldap, ulttyq bilim berý júiesine kesiri timeitindei, otandyq bilim sapasyn jańa sapaǵa kóteretin eń ozyq tásilderin asa saqtyqpen engizýimiz qajet... Bul endi bizdiń oi...
Sonymen, ministr "Saýat ashý" pániniń ornyna "Ana tili" páni oqytylatynyn, al nólinshi synyptarda "Álippemiz" qalatynyn, "Qazaq tili men ádebieti", "Tarih", "Lingvistika", "Shyǵystaný" óz ornynda ekenin, bolashaqta da bul pánderdiń saqtalatynyn, kafedralar qalypty jaǵdaida jumys istep jatqandyǵyn, elektrondy taqta ázirge bolmaitynyn, "Serpinge" qosymsha 500 oryn bergenin aitty...
Alda Almatyda ministr ziialy qaýym ókilderimen "tet-a-tet" kezdesýdi josparlap otyr eken. Buiyrtsa, sol kezdesýge qatysyp, eki taraptyń áńgimesin óz qulaǵymmen estip, múmkindigimshe tikelei efir arqyly sizderdi habardar etsem degen oiym bar. Tátti sózdi ashqaraqtana jutyp, ashy sózdi lezde túkirip tastaityn qazaq men emes. Aldymen, kóreiik, sóileseiik, tipti qajet bolsa, komissiia qurýdy usynaiyq... Ótiriktiń órge baspaitynyn bilem, ministrdiń sózi ras bolsa bizge jaqsy, ótirik bolsa - ókpelemesin...
Dina Elgezektiń feisbýktaǵy jazbasynan
