Bizde ózi qyzyq qoi...
Blogerdi qarjymen qamtamasyz eteiik deidi... Peiil durys... Biraq, memleket aqshasyna kúneltip otyrǵan keibir saittar aqsha almaǵaly 9 aiǵa jýyqtady... Saittardy qoldan ashqursaq etip otyrǵan memleket blogerlerdi ashyqtyryp qoimaitynyna kepildik bere ala ma? Alty Alashty saýatty, táýelsiz oi-jazbasymen moiyndatqan, qoǵamda óz ornyn nyqtap, eldiń súiispenshiligine bólengen myqty blogerler 9 ai jalaqy kútip sarqylǵan sait tilshileri qusap kóne qoiar ma? Álde, ikemge kóne bermeitin blogerlerdi otandyq BAQ matalǵan shynjyrǵa bailap alý - negizgi mindet pe???
Qazaqtyń áigili machosyn da jerden alyp jerge saldyq... Qazaq qoǵamy ondai uiatsyzdyqty quddy alǵash ret estigendei aiyptap, bet shymshystyq... Kúlkimdi keltirmeńizder... Basekeńderge sulý qyz izdep, qazaqtyń órimdei qarakózderin talai "qaryndynyń" astyna sap júrgen sýtener sheneýnikter aramyzda joq pa? Úndemeisizder...
Áielderge bala týǵyzý kerek, bas-basymyzǵa 4-5 áielden alyp, qazaqtyń sanyn kóbeiteiik deitin ánshi seriler kóbeidi... Áielderdi aiaǵan túrleri... Alaida, arǵy jaǵyn nápsi tesip barady... Kókelerim-aý, aqshań tasyp bara jatsa, áieldi aiamai-aq qoishy, jetimder úiinde toz-toz bop, aialy alaqanǵa shólirkegen tul jetimdi asyrap alshy... Eń qurǵanda bireýin... Jetimdi meiirimge qandyr, tárbie men bilim ber... Sapaly bala - qazir trendtegi sóz "ýmnaia natsiia" - parasatty, sapaly ulttyń kepili emes pe? Shet elden kelgen ózge ulttar saý emes, aýrý balany asyrap, ony emdep, balaǵa baryn berip, adam qataryna qosyp jatady... "Balalardy syrtqa bermeiik" dep taǵy ótirik oibailaimyz... Jaqsy, syrtqa bala bermeiik, biraq, sol túrli dertke shaldyqqan jetimderdi nege ózimiz asyrap alyp, emdep, jaǵdaiyn jasamaimyz? Taǵy basymyzdy tómen túsiremiz...
"Salafitter ushaq aidap ketpekshi boldy, salafitter terroristik dúmpý jasady, birdeńe joiqynnyń aldyn aldyq, ol - destrýktivti uiym, ultymyzdyń jaýy"- dep sheneýnikter des bermeidi... Olai bolsa, salafizmge nege zańdy túrde shekteý qoimaidy? Zańdy túrde tiym salýǵa jáne qyryq syltaý tabady... "Salafittik ideologiiaǵa ultymyz ózi-aq toitarys beredi!" Ministr Ermekbaevtyń pafosqa toly ádemi jaýaby! Biraq, qalaisha? Taǵy únsizdik...
Dina Elgezektiń feisbýktegi jazbasynan
