Kópirden kólikpen óttim... Qart Esildiń murtyna muz qatyp tur eken... Jazda da Esildiń esip aqqanyn baiqamappyn... Qashannan jaibaraqat... Al, Esildiń jaǵasyna jaiǵasqan kei esersoqtaý aǵalarymnyń esirgenin estisem, Esilden uialyp ketem...
Iá...
Búgin shimirikpesten kózine maqtaǵan jaǵympazdar, kúni erteń kózi taisa, op-ońai sata salatynyna kúmánim joq... Jaǵympazdyq pen satqyndyq qashannan qatar júredi...
Jaǵynýdan aty shyqqan sol "jaqsylar" biylǵy Álihan Bókeihan atamyzdyń 150 jyldyq qurmetine nendei igi usynys jasady? "Babamyzdyń torqaly toiyn nege óz dárejesinde ulyqtamadyq, nege jetim qyzdyń toiyndai ótti" dep shamdanǵan, kelesi jyly atalyp ótetin Alashordanyń mereitoiyna aldyn ala qamdanǵan bireýi bar ma? Árine, joq...
Al, aiaýly Astanaǵa til tigizbeiikshi... Bul qala - bizdiń tól qýanyshymyz ǵoi... Táýelsizdigimizdiń simvoly! 300 jyl bodandyqtan bosap shyqqan ultymyzdyń birinshi Jeńisi! Derbes, azat memleketimniń alǵashqy batyl sheshimi! Prezidenttiń bir aitqany bar edi ǵoi: " Ashyǵyn aitaiyn, bul sheshimniń bizdiń ulttyq qaýipsizdigimizge qatysy bar. Aiaýly Saryarqany saiasi saýdaǵa salyp, darhan dalamyzdy daý-damaiǵa ainaldyrǵysy keletinder bar kezde, soltústiktegi shyraily óńirge sýyq kóziniń suǵyn qadaityndar bar kezde biz myna jyly jerde, Almatyda tynysh otyra almas edik. Biz Alataýdyń baýraiyna syimai ketken joqpyz, qaita jer jánnáty Jetisýdy qimai-qimai kettik. Tarihtyń qatal talaby osyndai."
Biz, daýlasaiyq-daýlaspaiyq, biraq, Astana - Nazarbaevtyń keleshek urpaqqa qaldyrǵan jaýhar eskertkishi... Bolashaq urpaq Astana avtorynyń qurmetine esimin berse jarasar, al qazirgi ekonomikalyq qysyltaiań shaqta bul ne daýryǵý? Álde, búkil másele sheshilip tastap, bar dúnie Astananyń ataýyna tirelip qaldy ma? Ataýdy aýystyrýǵa 400 million aqsha ketedi dep eseptep tastapty áldekimder... Odan kóp bolmasa...
Biyl Jeltoqsan oqiǵasyna 30 jyl... Álgi jaisańdar Táýelsizdik jolynda qurban bolǵan jastarymyzdyń qurmetine Astanada eskertkish ornataiyq dep nege bastama kótermeidi?
Talai ulystar tý tikken bul jerge... Talai asyldar keńse qurǵan...
"Bul jalǵandy buzatyn arsyz adamnyń" talaiyn kórgen er Esil, eki aiaqtylardyń tórt aiaqtap qoldaitynyn estimegen shyǵar...
Dina Elgezektiń feisbýktegi jazbasynan
