Dimash Qudaibergenniń tuńǵysh jeke albomy 37 sekýndtyń ishinde «platinaly» dárejesine jetken, dep habarlaidy "Ult aqparat".
Bul jańalyqty ol óziniń Instagram paraqshasynda jariialady.
«Bir saǵat buryn meniń alǵashqy jeke albomym shyqty. 37 sekýnd ishinde «platina» deńgeiine jetti. Al bir saǵatta 3 márte «platinalyq» satylym kórsetkishine shyqty. Óte baqyttymyn. Meni barlyq bastamalarymda qoldap kele jatqan tyńdarmandaryma kóp rahmet. Meniń tabysym sizderdiń arqalaryńyzda», - dep jazdy ol óz paraqshasynda.
Mýzykalyq albomǵa «platina» deńgeii satylym mólsherimen belgilenedi. Onyń shegi ár elde árqalai ekenin aitý kerek. Shoý-biznesi damyǵan AQSh-ta bul deńgei 1 mln satylymnan bastalsa, Reseide 100 myńdyq satylymmen ólshenedi.
