Sýret: Aqorda
Memleket basshysy Qasym-Jomart Toqaev mádeniet jáne óner qyzmetkerlerin marapattaý rásimine qatysyp, sharaǵa jinalǵandardy Mádeniet jáne óner qyzmetkerleri kúnimen quttyqtady, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy mádeniet pen ónerdi damytý memleketimiz úshin negizgi basymdyqtyń biri sanalatynyn jetkizdi. Sonymen qatar ult rýhaniiatyn jańǵyrtý isine qatysty naqty sharalar qolǵa alynyp jatqanyn atap ótti.
Bul oraida Memleket basshysy Dimashtyń biregei ónerine tánti bolǵan túrli eldiń azamattary Qazaqstannyń Ánuranyn shyrqap, kók týyn jelbiretip júrgenin aitty.
"Óner – tárbie quraly. Men Ulttyq quryltaidyń otyrysynda ult bolashaǵyna qaýip tóndiretin bes kesel týraly aittym. Qoǵamdy osy keselderden tazartýǵa mádeniet qairatkerleri zor úles qosyp keledi. Lýdomaniia men nashaqorlyqtyń ziianyn ashyp kórsetetin tyń týyndylar shyǵyp jatyr. Bul – óte durys bastama", – dedi Prezident.
Memleket basshysynyń aitýynsha, mádeniet salasynyń ókilderi halyqtyń rýhani qalqany bolýǵa tiis. Sondai-aq Prezident olardyń jas urpaqty jasampazdyqqa, jańashyldyqqa úiretýge, birlikti nyǵaitýǵa, ónimdi eńbek etýge baýlýǵa belsene atsalysatynyna senim bildirdi.
"Sizder mádeniet pen óner jolyna adal bolyp, qajyrly eńbek etip kelesizder. Oǵan búkil el kýá. Óner adamy úshin eń qundy marapat – halyqtyń ystyq yqylasy. Men tól mádenietimizdi damytýǵa mol úles qosyp júrgen bir top azamatty marapattaý týraly sheshim qabyldadym. Mádeniet salasynda erekshe orny bar 7 irgeli ujym biyl mereili beleske jetip otyr. Sondyqtan búgin negizinen osy mekemelerdiń qyzmetkerlerine joǵary memlekettik marapat tapsyrýdy jón kórdim", –dedi Qasym-Jomart Toqaev.
