Alǵys aitý kúni - beibitshilik pen dostyqqa, tynyshtyq pen yntymaqqa úndeitin mereke. Bul keńqushaq qurmet - elimizdegi túrli ult ókilderiniń arasyndaǵy adamgershilik qarym-qatynastyń ónegeli ólshemine ainaldy. Alǵys aitý kúni - halqymyz úshin aitýly izgi dástúrdei.
Qazaqstan halqy búgin tarihynda altynshy ret Alǵys aitý kúnin atap ótedi.
Mine, osy mereili sátke orai elimizdiń atyn tórtkúl álemge pash etip júrgen daryndy ulymyz Dimash Qudaibergenniń malaiziialyq tyńdarmandary qazaq halqyna jáne ánshiniń ózine shynaiy, aqjarma tilekterin bildire kele, alǵys aitý kúnimen quttyqtap, arnaiy video-sálemdemesin joldady.
Eske sala keteiik, 2016 jyldyń 14 qańtarynda Elbasy Nursultan Nazarbaev Jarlyqqa qol qoiyp, oǵan sáikes, 1 naýryz - elimizde Alǵys aitý kúni dep jariialandy.
N. Nazarbaev 2015 jyldyń 22 sáýirinde Assambleianyń XXII sessiiasynda Alǵys aitý kúnin belgileýge ne túrtki bolǵanyn tarihpen bailanystyra otyryp aityp bergen edi. Tuńǵysh Prezident stalindik rejim kezinde Qazaqstanǵa kóptegen halyqtar jer aýdarylǵanyn - 800 myńǵa jýyq nemis, 102 myń poliak, 550 myń Soltústik Kavkaz halqynyń ókilderi, 18,5 myń Qiyr Shyǵystaǵy korei otbasylary kóship kelýge májbúr bolǵanyn eske salǵan bolatyn.
Taǵdyrdyń tálkegimen elimizge qonys aýdarǵan túrli etnos ókilderin qazaq halqy qushaq jaia qarsy alyp, aýyrtpalyq ataýlyny birge kóterdi. Bul kún - qiyn-qystaý kezeńderde qýanysh-qaiǵyny bólisip, pana bola bilgen qazaq halqyna ózge ult ókilderiniń alǵys aitatyn kúni.
