Qazaqstandyq ánshi Dimash Qudaibergenniń jeke kontserti alǵash ret Kýbanyń «Canal Clave» telearnasynan kórsetildi, dep habarlaidy "Ult aqparat" dimashnews.com saityna silteme jasap.
Kýbalyqtar álemge tanymal qazaq ánshisiniń ónerin «Canal Clave» telearnasynan tamashalady. Bir saǵattyq baǵdarlama barysynda Dimashtyń 2019 jyldyń naýryzynda Reseidiń Máskeý qalasynda anshlagpen ótken «D-Dynasty» atty jeke kontsertiniń jazbasy kórsetildi.
Kýbalyq «Canal Clave» telearnasy efirge 2013 jyly shyǵa bastady. Telearna mýzykalyq baǵytty ustanǵan. Kýbalyq jáne álemdik deńgeidegi ánshilerdiń beinebaiandaryn, ánderin, kontsertterin jáne óner adamdary týraly derekti filmderdi transliatsiialaidy. Táýligine 15 saǵat efirge shyǵatyn telearnanyń qazir túrli 22 baǵdarlamasy bar.
Dimashtyń kýbalyq jankúierleri «Canal Clave» telearnasynyń resmi paraqshalaryna birneshe ai boiy hat joldap, onyń ónerin ekrannan kórsetýdi suraǵan. Nátijesinde ótinish oryndalyp, kýbalyq telearnadan qazaqstandyq talanttyń kontserti berildi.
«Dimash Cuba Dears» 2019 jyldyń qarasha aiynda qurylǵan. Sodan beri kýbalyq fanattar Dimashtyń ánderin tanytýdy qolǵa alǵan. Ásirese buqaralyq aqparat quraldary arqyly óz elderinde nasihattap keledi.
Aita keteiik, biyl mamyr aiynda Dimashtyń kontserti alǵash ret «Cubavisión» telearnasynda kórsetilgennen keiin, jergilikti ózge telearnalar, radiostantsiialar óz efirleri men jelileri arqyly qazaqstandyq ánshiniń kontsertterin transliatsiialaýǵa qyzyǵýshylyq bildire bastady. Bul – Dimashtyń kýbalyq Dears-tarynyń eńbegi. Olardyń usynysymen 23 tamyzda «Radio Progreso» tanymal radiostantsiiasy altyn daýys iesiniń kontsertin efirge shyǵaryp, eń úzdik baǵdarlamalar reitingi boiynsha ekinshi oryndy ielendi.
