Ánshi Dimash Qudaibergenniń jankúierleri tosynsyi jasady. Olar A.Jubanov atyndaǵy mýzykalyq kolledjge jańa kúisandyq syilady, dep habarlaidy QazAqparat tilshisi.
Búgin A.Jubanov atyndaǵy mýzykalyq kolledj óz shákirtiniń jankúierleri syilaǵan syilyqty qabyldady.
«Dimashtyń Amerikadaǵy fanklýby men álemniń ár túkpirindegi jankúierleri Aqtóbe mýzykalyq kolledjine syi jasaýdy qalady. Sonymen qatar, Dimashqa 4 jyl boiy dáris bergen Marat Áitimovtiń synybyna dep aitty. Meniń oiynsha bári de Dimashty tanyǵan kúnnen jankúier dep oilaimyn. Al fanklýbtyń qurylǵanyna 2-3 jyl boldy», - dedi ánshi Dimash Qudaibergenniń anasy Svetlana Aitbaeva.
Aita keteiik, fanklýb músheleri ótken jyly Aqtóbe qalasyna kelip, ánshi oqiǵan mektep men mýzykalyq kolledjde boldy. Otbasymen tanysyp, kontsertke qatysty.
«Fanklýb múshesi Patris Grýllion Aqtóbege kelip, mýzyka kolledjinde ónerli balalardyń kontsertine qatysqan bolatyn. Sol kezde stýdentterdiń kontsertin tamashalap, syi jasaý týraly oilaǵan eken. Jankúierleri qarjylai kómek kórsetý týraly sheshim qabyldady. Al bul jerde kolledj ujymy aspap, onyń ishinde fortepiano qajet dep sheshken eken. Usynys fanattardan boldy. Olar únemi kómektesýge daiyn turady. Tek kolledjge ǵana emes, Aqtóbe qalasyndaǵy, Qazaqstandaǵy túrli salaǵa kómektesti. Máselen, Almatydaǵy onkologiialyq balalar dispanserine turaqty kómek berip júr. Sol mekemede em alyp jatqan balalardyń bári Dimashtyń jankúierleriniń jiti baqylaýynda. Olar oiynshyqtaryn aparyp, sóilesip, syi jasaidy, qarjy aýdarady. Aqtóbe óńirindegi az qamtylǵan otbasylarǵa kiim-keshek, azyq-túlik te aparyp júr. Biz ol adamdarǵa alǵys aitamyz», - dedi S.Aitbaeva.
Jalpy Dimash Qudaibergenniń fanattary álemniń 110 elinde bar. Olardyń jalpy sany 10 million adamǵa jýyq eken.
«Fantoptardyń ózara qarym-qatynasy, bizben bailanysy bar. Biz bir-birimizben habarlasyp turamyz», - dedi ánshiniń anasy.
Fortepiano quny 1 million 380 myń teńge turady. Jańa aspapta jankúierleri jibergen lebiz jazylǵan.
