ەنشٸ ديماش قۇدايبەرگەننٸڭ جانكٷيەرلەرٸ توسىنسىي جاسادى. ولار ا.جۇبانوۆ اتىنداعى مۋزىكالىق كوللەدجگە جاڭا كٷيساندىق سىيلادى, دەپ حابارلايدى قازاقپارات تٸلشٸسٸ.
بٷگٸن ا.جۇبانوۆ اتىنداعى مۋزىكالىق كوللەدج ٶز شەكٸرتٸنٸڭ جانكٷيەرلەرٸ سىيلاعان سىيلىقتى قابىلدادى.
«ديماشتىڭ امەريكاداعى فانكلۋبى مەن ەلەمنٸڭ ەر تٷكپٸرٸندەگٸ جانكٷيەرلەرٸ اقتٶبە مۋزىكالىق كوللەدجٸنە سىي جاساۋدى قالادى. سونىمەن قاتار, ديماشقا 4 جىل بويى دەرٸس بەرگەن مارات ەيتٸموۆتٸڭ سىنىبىنا دەپ ايتتى. مەنٸڭ ويىنشا بەرٸ دە ديماشتى تانىعان كٷننەن جانكٷيەر دەپ ويلايمىن. ال فانكلۋبتىڭ قۇرىلعانىنا 2-3 جىل بولدى», - دەدٸ ەنشٸ ديماش قۇدايبەرگەننٸڭ اناسى سۆەتلانا ايتباەۆا.
ايتا كەتەيٸك, فانكلۋب مٷشەلەرٸ ٶتكەن جىلى اقتٶبە قالاسىنا كەلٸپ, ەنشٸ وقيعان مەكتەپ مەن مۋزىكالىق كوللەدجدە بولدى. وتباسىمەن تانىسىپ, كونتسەرتكە قاتىستى.
«فانكلۋب مٷشەسٸ پاتريس گرۋلليون اقتٶبەگە كەلٸپ, مۋزىكا كوللەدجٸندە ٶنەرلٸ بالالاردىڭ كونتسەرتٸنە قاتىسقان بولاتىن. سول كەزدە ستۋدەنتتەردٸڭ كونتسەرتٸن تاماشالاپ, سىي جاساۋ تۋرالى ويلاعان ەكەن. جانكٷيەرلەرٸ قارجىلاي كٶمەك كٶرسەتۋ تۋرالى شەشٸم قابىلدادى. ال بۇل جەردە كوللەدج ۇجىمى اسپاپ, ونىڭ ٸشٸندە فورتەپيانو قاجەت دەپ شەشكەن ەكەن. ۇسىنىس فاناتتاردان بولدى. ولار ٷنەمٸ كٶمەكتەسۋگە دايىن تۇرادى. تەك كوللەدجگە عانا ەمەس, اقتٶبە قالاسىنداعى, قازاقستانداعى تٷرلٸ سالاعا كٶمەكتەستٸ. مەسەلەن, الماتىداعى ونكولوگييالىق بالالار ديسپانسەرٸنە تۇراقتى كٶمەك بەرٸپ جٷر. سول مەكەمەدە ەم الىپ جاتقان بالالاردىڭ بەرٸ ديماشتىڭ جانكٷيەرلەرٸنٸڭ جٸتٸ باقىلاۋىندا. ولار ويىنشىقتارىن اپارىپ, سٶيلەسٸپ, سىي جاسايدى, قارجى اۋدارادى. اقتٶبە ٶڭٸرٸندەگٸ از قامتىلعان وتباسىلارعا كيٸم-كەشەك, ازىق-تٷلٸك تە اپارىپ جٷر. بٸز ول ادامدارعا العىس ايتامىز», - دەدٸ س.ايتباەۆا.
جالپى ديماش قۇدايبەرگەننٸڭ فاناتتارى ەلەمنٸڭ 110 ەلٸندە بار. ولاردىڭ جالپى سانى 10 ميلليون ادامعا جۋىق ەكەن.
«فانتوپتاردىڭ ٶزارا قارىم-قاتىناسى, بٸزبەن بايلانىسى بار. بٸز بٸر-بٸرٸمٸزبەن حابارلاسىپ تۇرامىز», - دەدٸ ەنشٸنٸڭ اناسى.
فورتەپيانو قۇنى 1 ميلليون 380 مىڭ تەڭگە تۇرادى. جاڭا اسپاپتا جانكٷيەرلەرٸ جٸبەرگەن لەبٸز جازىلعان.
