Qazaqstandyq ánshi Dimash Qudaibergen Resei astanasynda jeke kontsertin ótkizý úshin Máskeýge ushyp keldi. Bul týraly QazAqparat agenttigi habarlady.
Áýejaida Dimashty álemniń 56 elinen jinalǵan júzdegen jankúieri gúldermen, plakattarmen qarsy aldy. Olar kýmirine sálem berý úshin Resei astanasyna arnaiy kelgen.
«Dimashtyń biregei daýysyn 2 jyl buryn estidim. Sodan beri men tek onyń ánderin tyńdaimyn», - dep bólisti Dimashtyń «Eýraziia fan-klýby» ókili, onyń jankúieri Rostislav.
Qazaqstandyq ánshiniń Anna esimdi jankúieri Dimashtyń daýsyn estip, onyń kontsertin tamashalaý úshin Bostonnan arnaiy ushyp kelgenin aitty.
«Maǵan onyń shyǵarmashylyǵy qatty unaidy. Endi Qazaqstanǵa barýdy armandaimyn», - dep atap ótti Anna.
«Men Dimashty qarsy alý úshin jáne onyń kontsertine qatysý úshin Odessadan kelip otyrmyn. Biz úshin Dimash - jańashyldyq. Barlyǵymyz Dimashty jaqsy kóremiz jáne onyń Ýkrainada kontsert ótkizgenin qalaimyz», - dedi Ýkrainadaǵy Dimashtyń fan-klýbynyń ókili Evgeniia.
Qazaqstandyq ánshiniń jankúierleri úshin kópten kútken sát keldi. Dimash jankúierlerine sálem berý úshin shyqty. Jankúierleri qol shapalaqtap qarsy alyp, gúlderin usyndy.
Eske salaiyq, 22 naýryzda kóktemgi Naýryz merekesinde Máskeýde - eldiń bas sahnasynda - Memlekettik Kreml saraiynda Dimashtyń alǵashqy jeke kontserti ótedi.
