«Slavian bazary» baiqaýynda birinshi orynmen elge oralǵan Ernar Sadyrbaev Dimash Qudaibergenmen salystyratyn adamdarǵa jaýap berdi, dep habarlaidy Baq.kz tilshisi.
«Slavian bazary» baiqaýy osydan úsh jyl buryn Dimash Qudaibergenniń de juldyzyn jaqqan edi. Endi mine Ámire de Dimashtyń jolyn qýyp, halyqaralyq festivalden júldemen oraldy.
«Bizdiń elde de, Belarýste de Dimash týraly kóp estidim. Dimashty bári óte qatty syilaidy. Vitebskte Dimashtyń kontsertinde boldyq. Qytaidan, jan-jaqtan jankúierleri keldi. Keide jurt meni Dimashpen salystyryp jatady. «Sen Dimashqa jetpeisiń» dep jamandap jatatyndar bar. Shynymdy aitsam, sondai adamdardy túsinbeimin. Meniń maqsatym ol emes», - deidi Ámire.
Ol árkimniń óz dara joly bar ekenin atap ótti.
«Árkimniń Qudai bergen talanty bar. Men Dimashty adam retinde syilaimyn, jaqsy kóremin. Ony únemi aityp júremin. Onymen baiaǵydan tanyspyz. Ol meniń áriptesim ári dosym. Árdaiym Dimashty qoldap júremin, ol da meni solai qoldaidy. Oǵan tek qana sáttilik tileimin», - dedi ánshi.
Eske sala ketsek, «Slavian bazarynda» qazaqstandyq ánshi Ámire men Rýmyniia elinen kelgen Marchel Roshka ekeýi birdei 156 upai aldy. Degenmen qazylar baiqaýdyń Gran-pri júldesin Roshkaǵa, al 1-oryndy Ernar Sadyrbaevqa berdi. Ýkrainadan kelgen ánshi – ekinshi oryndy, al úshinshi oryn Polsha men Belarýs eliniń daryndylaryna buiyrdy.
