Qazaq ulttyq óner ýniversitetiniń rektory Aiman Musaxodjaevanyń aitýynsha, Dimash Qudaibergen óziniń repertýaryn jańartyp jatyr, dep habarlaidy QazAqparat tilshisi.
"Qazirgi kezde ol Hunan TV stýdiiasynda jańa ánderin jazýda. Biraq qandai ánder jáne kimniń jazǵany týraly ázirshe aita almaimyz. Negizi jańa ándi jazý ońai emes qoi. Kontsertke bir ai ýaqyt qaldy. Dimashtyń júrekke jaqyn ánderdi oryndaitynyn bilemiz. Sonyń bárin jeke kontsertinde tyńdai alasyzdar. Jalpy oǵan repertýardy únemi jańartyp otyrý qajet. Ol shyǵarmashylyq úshin, ánshi retinde ósý úshin kerek", - dedi A. Musaxodjaeva jýrnalisterge bergen suxbatynda.
Onyń aitýynsha, kontsertte Dimashpen birge án aitatyn estrada juldyzdary áli anyqtalǵan joq. Degenmen, aǵaiyndy Meladze, Lara Fabian, sondai-aq qazaqstandyq ánshilermen kelissózder júrip jatyr. "Árine, "I am Singer" baiqaýynda Dimashpen birge óner kórsetken ánshilerdiń kelgenin de qalar edik. Sebebi olar birge de, bólek te án aita alady. Baiqaý ánshileriniń Qazaqstanǵa kelý-kelmeýine qatysty naqty eshteme aita almaimyn. Degenmen, qytailyq juldyzdardyń Hunan TV-men kelisimderi bar ekenin eskersek, kontsertke olardyń da kelýi bek múmkin", - dep atap kórsetti ýniversitet basshysy.
Aita keteiik, buǵan deiin ministr Arystanbek Muxamediuly da Dimashtyń kontserti jaiynda aitqan bolatyn. "Biz qytailyq Hunan TV arnasymen kelisimshartty rásimdedik. Shoý óte qyzyqty bolady. Sebebi oǵan úzdik rejisserler tartylýda. Qazirgi kezde biz estradalyq-simfoniialyq orkestrdi jasaqtadyq. Dirijerdi de anyqtap qoidyq. Al Dimashpen birge án aitatyn ártister týraly ázirge eshteńe aita almaimyn. Óitkeni kelisimshart talaptary naqtylanýda", - dedi Muxamediuly búgin jýrnalisterge bergen suxbatynda.
