Amerikalyq The World's Best talanttar shoýynyń sarapshysy Gaýhar Nurtas qazaqstandyq Dimash Qudaibergen men Daneliia Tóleshovany AQSh jurtshylyǵynyń qalai qabyldaǵanyn aityp berdi, dep habarlaidy QazAqparat tilshisi.
Sanaýly kúnderden keiin CBS telearnasynda The World's Best jahandyq talanttar shoýy bastalady. Oǵan Qazaqstan atynan Dimash pen Daneliia alǵash ret qatysady. Sonymen birge, ádil qazy alqasynyń quramynda qazaqstandyq prodiýser, rejisser Hollywood Film Academy ® kompaniiasynyń negizin qalaýshy Gaýhar Nurtas bar.
Úmitkerlerdi basty úsh tóreshi - Driý Berrimor, Rý Pol jáne Feit Hill, sonymen birge halyqaralyq sarapshylar toby baǵalaidy. Otandasymyz Gaýhar Nurtas dál osy halyqaralyq toptyń quramyna engen.
Gaýhardyń aitýynsha, joba túsirilimi áli jalǵasýda, alǵashqy 10 epizod 3 aqpannan bastap CBS telearnasynda kórsetile bastaidy.
«CBS telearnasy kásibi tájiribesi bar, sarapshy bola alatyn adamdarǵa izdeý saldy. Shoý uiymdastyrýshylary Qazaqstan konsýldyǵyna habarlasqanda meniń aty-jónimdi estigen. Joba týraly aqparat eshkimge aitylmaǵan. Shoý bolatynyn eshkim bilgen joq. Kútpegen jerden uiymdastyrýshylar maǵan habarlasyp, jobaǵa 50 sarapshynyń biri retinde Qazaqstan atynan qatysýdy ótindi», - deidi Gaýhar Nurtas.
Buǵan deiin G. Nurtas televiziialyq jobada qazylyq etip kórmegen. Alaida, ol aýqymdy jobalar men festivalderge prodiýserlik etkenin, qazylar alqasyn tańdaýda tájiribesi bar ekenin atap ótti.
«Biraz jyldan beri Amerikada turamyn jáne Daneliia meni tań qaldyrdy. Onyń kásibi deńgeii joǵary jáne daýsy zor. Daneliia bolashaqta úlken juldyzǵa ainalady. Barlyq sarapshylar osyndai pikir aitty. Dimashqa kelsek, ony bári tanidy, jaqsy kóredi. Dimashty jandy daýysta tyńdaǵan tipti áserli eken. Kórermenderge onyń talanty erekshe unady», - dedi ol.
Gaýhar Nurtas Amerikada uzaq jyl turyp, Qazaqstan týraly durys kózqaras qalyptastyrýǵa tyrysqanyn jetkizdi.
«Elimizdi tanytatyn úlken múmkindik týdy. Endi álem jurtshylyǵy Qazaqstandy talanttar eli retinde tanidy», - deidi prodiýser.
Sonymen birge, ol aldaǵy josparlarymen bólisip, jańa jobalary jóninde aityp berdi. Amerikalyq talanttar shoýynan bólek, G. Nurtas Mońǵoliiamen birlesip, ekshn-filmge prodiýserlik etýde. Atalǵan film biyl qazaqstandyq kinoprokatqa shyǵady.
