19 qarasha kúni Londonda Dimash Qudaibergenniń jeke kontserti bolady, dep habarlaidy "Ult aqparat". Is-shara Ulybritaniiadaǵy Qazaqstan mádenieti kúnderi aiasynda ótpek.
«DQ» - Ulybritaniiadaǵy Qazaqstan mádenieti kúnderin atap ótý sheńberinde arnaiy daiyndalǵan, Dimash Qudaibergenniń jańa biregei shoýy. Bul shara Qazaqstan Respýblikasynyń Mádeniet jáne sport ministrligimen uiymdastyrylyp, Qazaqstan Respýblikasynyń Ulybritaniia jáne Soltústik Irlandiia Birikken Koroldigindegi Elshiligi qoldaýymen ótedi. Kontsertten túsken barlyq qarajat Qazaqstandyq daryndy jastardy qoldaýǵa jumsalmaq. Baǵdarlama 2008 jyldan beri jumys istep keledi jáne 10 jylda 1000-ǵa jýyq daryndy jastartyń halyqaralyq baiqaýǵa qatysýyna qol ushyn berdi.
Biletter 19 qazan kúni London ýaqytymen tańǵy saǵat 11:00-de satylymǵa shyqty. Búginge deiin aldaǵy shoýǵa biletterdiń shamamen 80%-y satyldy. Olardy axs.com saitynan satyp alýǵa bolady, bul týraly ánshi Instagram jelisindegi paraqshasynda jariialady:
«Dostar! Sizdermen Londondaǵy kezdesýdi asyǵa kútýdemin! Daiyndalyńyzdar! Sizderge arnaiy tosynsyi ázirledim. Bul keremet shoý bolatynyna ýáde beremin! Taǵy bir tosynsyi bar: biletterdi áli de satyp alýǵa bolady! axs.com saityna ótip, biletterdi satyp alyńyzdar».
Biregei shoý ataqty «Indigo at The O2» kontsert zalynda ótedi. Munda kórermen Dimash Qudaibergenniń jańa baǵdarlamasyn tamashalai alady. Kórermenge kontsert esigi London ýaqytymen saǵat 18:30-da ashylady, baǵdarlama 20:00-de bastalady dep josparlanýda.
Eki saǵattyq kontserttik baǵdarlama 4 bólimnen turady. Sahnadaǵy barlyq kórinis live-band, bi qoiylymdarymen, 3D-effektilermen jáne taǵy sol siiaqtylarmen súiemeldenedi. Shoý fan-aýmaqtyń kórermeni jalpy performanstyń bir bólshegi bolatyndai etip uiymdastyrylady.
Dimash ómirden ótken dosy Denis Tendi eske alý qurmetine «SOS d'un terrien» ánin oryndaidy. Odan bólek, ánshiniń osy keshtegi repertýarynda, jankúierleri Dimash Qudaibergenniń oryndaýynda súiip tyńdaityn shyǵarmalar oryndalady. Sonymen qatar, 19 qarasha kúni Londonda qonaqtardyń nazaryna mýzykalyq premeralar - jaryqqa alǵash shyǵatyn shyǵarmalar usynylady. Shoý barysynda jas ánshi, án salyp, bi bilep qana qoimai, ártúrli mýzykalyq aspaptarda oinaidy. Bul - shoýdyń taǵy bir ereksheligi bolmaq.
Dimash Qudaibergen - qazaqstandyq ánshi, kompozitor, mýlti-aspapshy ekenin, vokaldyq diapazony óte keń - 5 oktav, 4 nota jáne 1 jarty tondy qamtitynyn esterińizge salamyz. Sonymen qatar ol «Singer», «Baiqońyrdyń sazdy úni», «Jas qanat», «Shyǵys bazary», «Meikin Aziia», «Slavian bazary» tárizdi iri mýzykalyq baiqaýlarǵa qatysyp, jeńiske jetken.
