Qazaqstandyq ánshi Dimash Qudaibergen Igor Krýtoidyń týǵan kúnine arnalǵan keshte tanymal opera ánshilerimen birge án saldy, dep habarlaidy «Ult aqparat».
Dimash Qudaibergen Máskeý sahnasynda «Ti amo cosi» ánin Lara Fabianmen birge oryndady. Sondai-aq, reseilik operalyq soprano ánshisi Aida Garifýllinamen qosylyp án saldy. Olardyń oryndaýyndaǵy ánniń videosy Dimashtyń instagram-daǵy paraqshasynda jariialandy.
Budan bólek, Dimash Qudaibergen italiialyq tanymal ánshi Andrea Bochellimen dýet oryndady. Olar Besame Mucho ánin shyrqady.
«Maestromen kezdespegeli biraz boldy. Grim jasaityn bólmede án aitýdy uiǵardyq. Sahnaǵa shyǵatyn sátti kútip otyrmyz. Álemdegi eń ádemi tenor - Andrea Bochellimen» dep jazdy Dimash Qudaibergen.
Buǵan deiin, Dimash Qudaibergen men Andrea Bochelli biyl mamyrda kezdesken bolatyn. Sol kezde italiialyq tanymal tenor ánshi Dimashtyń daýsyna tańǵalǵanyn jetkizgen.
Reseilik kompozitor Igor Krýtoi 65 jyldyq mereitoiyn Amerikadan soń óz Otanynda jalǵastyrdy. Bul keshte Dimash Passione ánin oryndady.
