Qytaidaǵy I Am a Singer mýzykalyq konkýrsyna qatysyp jatqan qazaqstandyq ánshi Dimash Qudaibergenov kópshilik tyńdarmannan ózin Vitaspen salystyrmaýdy surady, - dep habarlaidy "Ult aqparat". Bul týraly ánshi Instagram jelisindegi jeke paraqshasynda jazyp otyr.
Dimashtyń aitýynsha, ony hám onyń shyǵarmashylyǵyn reseilik ánshi Vitaspen salystyratyndar kóp. "Qaiyrly kesh, Dostar! Qazaqtyń Vitasy", "Vitas siiaqty aitady", "Ekinshi Vitas" degen maǵan teńeý sózderińizdi estip jatamyn! Árine, Vitas jaqsy ánshi, ony qurmetteimin, biraq men - "Ekinshi Vitas" emespin! Mýzykadan xabary bar mamandar meni jaqsy túsinedi", - dep jazdy ánshi.
Sonymen qatar, ol kelesi baiqaý kúnine rejisserlerdiń uiǵarymymen Vitastyń eń kúrdeli sanalatyn "Opera 2" kompozitsiiasyn oryndaitynyn da málimdedi. Aitýynsha, ol bul ataqty ándi Vitastyń daýysynan 4 modýliatsiiamen 2 ton joǵary aitýǵa bel býyp otyr. "Qalai bolatynyn baǵalai jatarsyzdar! Aitpaqshy, kelesi baiqaý kúni 28 qańtar kúni Beijiń ýaqytymen 22:05-te! Hunan tv online arqyly tamashalai alasyzdar!", - dedi ánshi.
Ol teleshoýdyń birinshi kezeńinde SOS d'un terrien en détresse ánin frantsýz tilinde oryndap, jeńimpaz atanǵan bolatyn. Ánshi qatysyp jatqan konkýrsta 14 kezeń bar. Konkýrs Qytaidyń Chansha qalasynda ótip jatyr. Menedjeriniń aitýynsha, Dimash Qudaibergenov osy konkýrsqa qatysý úshin imidjin ózgertipti. "Dimashtyń imidjin ózgerttik. Osyndai "lýk". Bul The voice emes, bul ataqty ári óner jolynda tanylyp úlgergen ánshilerdiń konkýrsy" degen edi munyń aldynda ánshiniń prodiýseri Sharimov.
