Dimash Qudaibergenniń otbasy «Mereili otbasy» ulttyq baiqaýynyń oblystyq kezeńinde bas júldege ie boldy. Óńirlik kezeńniń qatysýshylary 24 mamyr, beisenbi kúni Aqtóbede saltanatty túrde marapattaldy.
Aita keteiik, Aqtóbede baiqaýdyń tanymaldylyǵy men bedeli kún saiyn ósip keledi. Biyl oblystaǵy 148 eldi mekennen 500-den asa otbasy qatysýǵa ótinish berdi.
Eki ainalymnyń qorytyndysy boiynsha gran-pri iegeri Qudaibergen Aitbaev pen Miýa Nizamýtdinovanyń otbasy atandy.
Elý jyl otasqan jubailar bir ul men eki qyzdy, sonymen qatar, toǵyz nemereni tárbieledi. Solardyń biri – álemge áigili biregei vokalist Dimash Qudaibergenov. Aitbaevtar áýletine baiqaýǵa qatysyp, jeńimpaz atanǵandary úshin alǵys hat pen shipajaiǵa joldama berildi. Budan basqa, baiqaýdyń oblystyq týrynan ótken taǵy 27 januia alǵys hattarmen jáne turmystyq tehnikalarmen marapattaldy. Sonymen qatar, júldeli oryndarǵa ie bolǵan Qobda aýdanynan kelgen Súleimenovter otbasyna, Yrǵyz aýdanynan Nurmanovtarǵa, Baiǵanin aýdanynan Kórpebaevtarǵa jáne Qarǵaly aýdanynan Pryimak januiasyna turmystyq tehnikalar tartý etildi.
Jeńimpazdardy oblys áimi Berdibek Saparbaev quttyqtady.
- Uiymdastyrýshylardyń atynan barlyq 506 otbasyǵa qatysqany úshin alǵys aitqym keledi. Otbasy - memleketti quratyn qoǵamnyń bólshegi. Eger otbasynda birlik, jaqsy tárbie, bilim, mádeniet, otanyna degen súiispenshilik bolsa, tutas memleket te sondai bolady. Árine, Qazaqstannyń jetistigi, eń aldymen, árbir qazaqstandyq otbasynyń eńbegi. Sondyqtan memleket basshysy Nursultan Nazarbaev qazaqstandyq otbasylardyń órkendeýin, árbir otbasy músheleriniń laiyqty bilim alýǵa, shyǵarmashylyq pen sportpen shuǵyldanýǵa, deni saý jáne baqytty bolýyn qamtamasyz etý úshin barlyǵyn jasaýda, - dedi oblys basshysy.
Ol Aitbaevtarǵa otbasylar kúnimen sáikes keletin konkýrstyń sońǵy respýblikalyq kezeńine jeńis tiledi.
Jyl saiynǵy «Mereili otbasy» baiqaýy Qazaqstan Respýblikasy Prezidentiniń bastamasymen quryldy. Negizgi maqsat - moraldyq qundylyqtardyń jańarýy, mártebeni kóterý jáne otbasy men nekege degen oń imidjdi qalyptastyrý.
Respýblikalyq jarystyń besjyldyq tarihynda Aqtóbe halqy bir ret absoliýtti jeńimpaz atandy. 2016 jyly Qazaqstan boiynsha Uly Otan soǵysynyń ardageri Abdýlla men Alila Nusqabaevtyń kóp balaly otbasy úzdik dep tanyldy.
