Ánshi Dimash Qudaibergenniń fan-klýby Niý-Iorkte úsh jyldyǵyn atap ótti, dep habarlaidy QazAqparat.
Manhettenniń týra ortalyǵynda Qazaqstannyń týy jelbirep, Uly dalanyń áýenderi shyrqaldy. Álemge áigili ánshiniń amerikalyq jankúierleri óz kýmiri men onyń Otanynyń qurmetine tosynsyidy tátti dám túrinde daiyndapty. Ataýly kúnge orai japondyq Noriko Brýnel hosh iisti ári túrli-tústi keksterdi pisirgen eken. Kekste qazaqtyń oiý-órnekteri men Dimash Qudaibergenniń beinesi tur. Niý-Iorktegi ómiriniń 30 jylynda japondyq basqa qurlyqtyń mádenietine dál osylai tuńǵysh ret erekshe áýestengenin aitady. Osylaisha, fan-klýb ókilderi juldyzdy otandasymyzǵa rizashylyqtary men qurmetterin bildirýge baryn salǵan.
«Birde Facebook qoldanýshylarynyń biri Dimashtyń oryndaýyndaǵy S.O.S ánin óz paraqshasynda jariialady. Dimashtyń daýsyn tyńdaǵan sátten-aq men tań-tamasha qaldym. Jubaiym frantsýz bolǵandyqtan, osy ándi soǵan tyńdatyp kórsettim. Ándi tyńdap otyryp, Dimashqa ǵashyq bolyp qalǵandai sezimde boldym. Biz, Dimash Qudaibergenniń Halyqaralyq fan-klýbynyń, DKIFC-tiń jáne «Dimash USA» fan-klýbynyń múshesimiz. Dimash osynda ushyp kelgende, biz ony barynsha qoldaýǵa, Niý-Iork halqyna ony kóbirek tanytýǵa qatty tyrysamyz», - dedi AQSh-taǵy fan-klýb múshesi Noriko Brýnel.
Úsh jyl buryn AQSh-ta Dimash Qudaibergenniń jankúierleriniń klýbyn qurǵan amerikalyqtar Qazaqstanǵa mindetti túrde kelý týraly sheshim qabyldapty. Kóbi Nur-Sultan men Almatyda bolyp úlgergen. Olardyń arasynda Ońtústik Afrikada dúniege kelgen Tania Iang ta bar. Ol qazir birshama jyldan beri Niý-Iorkte turady.
«Sizderdiń astanalaryńyz - Nur-Sultan men úshin erekshe jáne fýtýristik orynǵa ainaldy. Óziniń sáýletimen, tazalyǵymen, keńdigimen erekshelenedi eken. Men Dimashtyń Qazaqstanda osyndai konditerlik ónimdermen shai ishkendi unatatynyn jaqsy bilemin. Bul - shai ishýdiń ózindik mádenieti. Sondyqtan biz Dimashtyń shai ishý dástúrin qoldai otyryp, ózim ázirlegen tátti-dámdini Norikonyń daiyndaǵan keksine qosyp qoidym. Dimashtyń ánderiniń ishinde maǵan eń unaityny - «Umytylmas kún», al oryssha ánderinen - «Liýbov, pohojaia na son». Árine, men «Daididaýdy» da súiip tyńdaimyn», - dedi Niý-Iork turǵyny Tania Iang.
Amerikalyq Chelsi Dimond 2018 jyldyń naýryzynan beri fan-klýbtyń múshesi. Sodan beri ol Dimashtyń ánderin oryndap, qazaq tilin úirene bastaǵan.
«2018 jyldyń naýryz aiynda Youtube kanaldan bir kórip qaldyq ta, sol sátten bastap Dimashtyń jankúierine ainaldyq. Ol men úshin beitanys Qazaqstandy ashty. Qazaqstan jaily buryn eshteńe bilmeitin edim. Endi men osy elge ǵashyq bolyp qaldym! Mahabbat ber maǵan, taǵdyr, júrekti qozǵaǵan. Janymdy jalynǵa orap, úzilmei mazdaǵan. Mahabbat ber maǵan, taǵdyr, mahabbat ber maǵan. Eshqashan, eshkimde, esh kez bolmaǵan», - dep ándetip ketti Chelsi Dimond sóziniń sońynda.
Mýzykalyq álemniń búkil qyr-syry bir Dimashtyń boiynan aiqyn kórinedi dep esepteidi gonkongtyq Emi Tsei. Ol Niý-Iorkte týyp, júregin qazaq ánshisi jaýlap alatyny úsh uiyqtasa túsine kirmepti.
«Men qatty áserlendim. Onyń ónerin baqylai otyryp, belesterdi bir-birlep qalai baǵyndyrǵanynyń kýási boldym. Shynynda da, oilap qarasańyz, az ýaqyttyń ishinde osynshama biikke kóterilgen ánshiler neken-saiaq. Álbette, Bitlz toby óz tusynda keremet boldy. Biraq, bizdiń Dimash óz qarqynynan taimasa jýyq arada olardyń deńgeiine de jetedi», - deidi Emi Tsei.
Amerikalyq jankúierlerdiń taǵy biri brýklindik Dennis Dimashqa uqsaityn, tipti onyń janyna jaqyndai alatyn ánshiler álemde kemde-kem ekenin aitady.
Amerikadaǵy fan-klýb músheleri osylaisha óz áserimen bólisip, kýmirlerin asyǵa kútip júr.
